‘ఇరుముడి’లో మరో కీలక పాత్రకు తమన్నా?

తెలుగు చిత్ర పరిశ్రమలో దాదాపు రెండు దశాబ్దాలుగా తనకంటూ ప్రత్యేక స్థానం సంపాదించుకున్న తమన్నా మరో ఆసక్తికరమైన అవకాశంతో వార్తల్లో నిలుస్తోంది. ఇటీవల హిందీ ప్రాజెక్టులపై ఎక్కువగా దృష్టి పెట్టిన ఆమె, ఇప్పుడు మళ్లీ తెలుగు చిత్రాల్లో కీలక పాత్రలతో ప్రేక్షకులను అలరించేందుకు సిద్ధమవుతున్నట్లు సమాచారం.

మాస్ మహారాజా రవితేజ కథానాయకుడిగా దర్శకుడు శివ నిర్వాణ తెరకెక్కిస్తున్న కొత్త చిత్రం ‘ఇరుముడి’ ప్రస్తుతం నిర్మాణంలో ఉంది. మైత్రీ మూవీ మేకర్స్ సంస్థ భారీ స్థాయిలో నిర్మిస్తున్న ఈ చిత్రంలో ప్రియా భవానీ శంకర్ ప్రధాన కథానాయికగా నటిస్తోంది.

ఈ సినిమాలో మరో ముఖ్యమైన పాత్ర ఉందని, ఆ పాత్ర కోసం తమన్నాను ఎంపిక చేసినట్లు టాలీవుడ్ వర్గాల్లో వార్తలు వినిపిస్తున్నాయి. అయితే దీనిపై చిత్రబృందం నుంచి అధికారిక ప్రకటన ఇంకా వెలువడలేదు. తండ్రీ–కూతురు మధ్య ఉన్న భావోద్వేగ అనుబంధం, భక్తి అంశాలు మిళితమై ఈ కథ తెరకెక్కుతున్నట్లు సమాచారం. ఈ కథలోని ప్రత్యేక పాత్రకు తమన్నా సరైన ఎంపికగా భావించిన దర్శకుడు ఆమెను సంప్రదించినట్లు సినీ వర్గాలు చెబుతున్నాయి.

ఒకవేళ ఈ వార్తలు నిజమైతే, రవితేజ – తమన్నా కాంబినేషన్ మరోసారి తెరపై కనిపించబోతోందన్నమాట. ఇప్పటికే వీరిద్దరూ కలిసి పలు సినిమాల్లో నటించి ప్రేక్షకులను ఆకట్టుకున్న సంగతి తెలిసిందే. దీంతో ఈ కాంబినేషన్ మళ్లీ తెరపై ఎలా మెప్పిస్తుందో అన్న ఆసక్తి అభిమానుల్లో నెలకొంది.