టాటా సన్స్‌ పగ్గాలు మరో ఐదేళ్లు చంద్రశేఖరన్‌కే

టాటా గ్రూప్‌ హోల్డింగ్‌ కంపెనీ టాటా సన్స్‌లో కీలక పరిణామాలు చోటుచేసుకున్నాయి. 2027 ఫిబ్రవరిలో ప్రస్తుత పదవీకాలం ముగిసిన తర్వాత ఎన్‌. చంద్రశేఖరన్‌ను మరో ఐదేళ్లపాటు ఎగ్జిక్యూటివ్‌ ఛైర్మన్‌గా కొనసాగించేందుకు బోర్డు మెజారిటీతో నిర్ణయం తీసుకుంది. అదే సమయంలో టాటా సన్స్‌ను స్టాక్‌ మార్కెట్లలో లిస్టింగ్‌ చేసేందుకు అవసరమైన ప్రాథమిక చర్యలకు కూడా బోర్డు ఆమోదం తెలిపింది.

సెప్టెంబరు 17న ముంబయిలో జరిగిన బోర్డు సమావేశంలో ఈ నిర్ణయాలు తీసుకున్నారు. చంద్రశేఖరన్‌ మరోసారి బాధ్యతలు స్వీకరించేందుకు అంగీకరించగా, ఆయన పునర్నియామకానికి మెజారిటీ డైరెక్టర్లు మద్దతు తెలిపారు. అయితే ఈ నిర్ణయాలపై టాటా ట్రస్ట్స్‌ తీవ్ర అభ్యంతరం వ్యక్తం చేసింది. ట్రస్ట్స్‌ తరఫున బోర్డులో పాల్గొన్న నోయల్‌ టాటా చంద్రశేఖరన్‌ పునర్నియామక తీర్మానాన్ని వ్యతిరేకించారు.

చంద్రశేఖరన్‌ మరో టర్మ్‌ కొనసాగరాదన్న తన గత నిర్ణయాన్ని బోర్డు విజ్ఞప్తితో మార్చుకున్నట్లు టాటా సన్స్‌ తెలిపింది. గ్రూప్‌ ప్రయోజనాలు, ఆయన గత సేవలను విస్తృతంగా పరిశీలించిన అనంతరం నామినేషన్‌ అండ్‌ రెమ్యూనరేషన్‌ కమిటీ ఈ నిర్ణయం తీసుకుందని పేర్కొంది. అయితే నోయల్‌ టాటా మాత్రం గతంలో చంద్రశేఖరన్‌ పదవీ విరమణకు అంగీకారం లభించిందని, వారసుడి ఎంపికకు కమిటీ ఏర్పడిన తర్వాత మళ్లీ పునర్నియామకంపై ఓటింగ్‌ నిర్వహించడం సరైన ప్రక్రియ కాదని అభ్యంతరం వ్యక్తం చేశారు.

టాటా సన్స్‌ను ఆర్‌బీఐ 2022లో అప్పర్‌ లేయర్‌ ఎన్‌బీఎఫ్‌సీగా వర్గీకరించింది. నిబంధనల ప్రకారం ఇలాంటి సంస్థలు నిర్దిష్ట కాలవ్యవధిలో లిస్టింగ్‌ కావాల్సి ఉంటుంది. ఈ నేపథ్యంలో టాటా సన్స్‌ లిస్టింగ్‌ నుంచి మినహాయింపు పొందేందుకు తన ఎన్‌బీఎఫ్‌సీ రిజిస్ట్రేషన్‌ను సరెండర్‌ చేయాలని కోరింది. అయితే ఆర్‌బీఐ ఆ దరఖాస్తును తిరస్కరించడంతో లిస్టింగ్‌ ప్రక్రియ దిశగా వెళ్లాల్సిన పరిస్థితి ఏర్పడింది.

టాటా సన్స్‌ లిస్టింగ్‌ జరిగితే భారీ స్థాయి ఐపీఓగా నిలిచే అవకాశం ఉందని మార్కెట్‌ వర్గాలు అంచనా వేస్తున్నాయి. కంపెనీ విలువ సుమారు రూ.20 లక్షల కోట్ల స్థాయిలో ఉండొచ్చన్న అంచనాల నేపథ్యంలో, చిన్న శాతం వాటాను విక్రయించినా భారీ మొత్తంలో నిధులు సమీకరించే అవకాశం ఉంటుంది.

చంద్రశేఖరన్‌ పునర్నియామకంతో పాటు టాటా సన్స్‌ లిస్టింగ్‌ అంశం కూడా సంస్థలోని వాటాదారుల మధ్య భిన్నాభిప్రాయాలకు కారణమైంది. టాటా ట్రస్ట్స్‌ టాటా సన్స్‌ను అన్‌లిస్టెడ్‌గా కొనసాగించాలన్న అభిప్రాయాన్ని వ్యక్తం చేసినట్లు సమాచారం. మరోవైపు లిస్టింగ్‌ ప్రక్రియ ముందుకు సాగాల్సిన పరిస్థితి ఏర్పడటంతో బోర్డు తాజా నిర్ణయాలు తీసుకుంది.

చంద్రశేఖరన్‌ 2017లో టాటా సన్స్‌ ఛైర్మన్‌గా బాధ్యతలు చేపట్టారు. 2022లో మరో ఐదేళ్ల కాలానికి ఏకగ్రీవంగా నియమితులయ్యారు. తాజా నిర్ణయం అమల్లోకి వస్తే 2027 తర్వాత కూడా ఆయన మరో ఐదేళ్లు సంస్థకు నాయకత్వం వహించనున్నారు. అయితే పునర్నియామకం, లిస్టింగ్‌ అంశాలకు టాటా సన్స్‌ వార్షిక సర్వసభ్య సమావేశం ఆమోదం అవసరం.

టాటా సన్స్‌ లిస్టింగ్‌ నిర్ణయం, చంద్రశేఖరన్‌ కొనసాగింపు వార్తల నేపథ్యంలో టాటా గ్రూప్‌కు చెందిన పలు నమోదిత కంపెనీల షేర్లలో కొనుగోళ్లు కనిపించాయి. టాటా కెమికల్స్‌ షేరు 6.6 శాతం వరకు లాభపడగా, టాటా ఇన్వెస్ట్‌మెంట్‌ కార్పొరేషన్‌, టీఎమ్‌పీవీ, టాటా స్టీల్‌, టాటా పవర్‌, టాటా కన్జూమర్‌ ప్రొడక్ట్స్‌, ర్యాలీస్‌ ఇండియా, ట్రెంట్‌, టాటా ఎలక్సీ, వోల్టాస్‌, టీసీఎస్‌ తదితర షేర్లు కూడా లాభాల్లో ముగిశాయి.