రాజ్యసభకు నామినేషన్ దాఖలు చేసిన తెదేపా అభ్యర్థులు

తెలుగుదేశం పార్టీ రాజ్యసభ అభ్యర్థులుగా ఎంపికైన సానా సతీశ్‌, చింతకాయల విజయ్‌, భాష్యం రామకృష్ణ సోమవారం తమ నామినేషన్ పత్రాలను దాఖలు చేశారు. పార్టీ నేతలు, కార్యకర్తలతో కలిసి అసెంబ్లీలోని రిటర్నింగ్ అధికారి కార్యాలయానికి చేరుకుని నామినేషన్లు సమర్పించారు. అంతకుముందు తెదేపా కేంద్ర కార్యాలయంలో ఎన్టీఆర్ విగ్రహానికి నివాళులర్పించి ఆశీర్వాదాలు పొందారు.

ఇటీవల ఏపీలో ఖాళీ అయిన మూడు రాజ్యసభ స్థానాలకు ఈ ముగ్గురిని అభ్యర్థులుగా తెదేపా అధిష్ఠానం ప్రకటించిన విషయం తెలిసిందే. సామాజిక సమీకరణాలు, పార్టీకి చేసిన సేవలు, రాజకీయ అనుభవం, భవిష్యత్ నాయకత్వాన్ని దృష్టిలో ఉంచుకుని ఈ ఎంపికలు జరిగినట్లు రాజకీయ వర్గాలు విశ్లేషిస్తున్నాయి.

విద్యావేత్తగా, భాష్యం విద్యాసంస్థల అధినేతగా పేరుగాంచిన భాష్యం రామకృష్ణ పార్టీ ప్రతిపక్షంలో ఉన్న సమయంలోనూ అన్ని విధాలుగా అండగా నిలిచారు. కూటమి ప్రభుత్వం ఏర్పడిన తర్వాత కూడా పార్టీ సంస్థాగత నిర్మాణం, శిక్షణ కార్యక్రమాల్లో చురుకుగా పాల్గొంటూ వస్తున్నారు. గత ఎన్నికల్లో లోక్‌సభ టికెట్ ఆశించినా అవకాశం రాకపోయినా పార్టీ పట్ల నిబద్ధతతో కొనసాగారు.

కాకినాడకు చెందిన సానా సతీశ్ ఇప్పటికే రాజ్యసభ సభ్యుడిగా కొనసాగుతున్నారు. సామాజిక సమీకరణాలను పరిగణనలోకి తీసుకుని మరోసారి అవకాశం కల్పించారు. మరోవైపు బీసీ సామాజిక వర్గానికి ప్రాధాన్యం ఇవ్వడంతో పాటు యువ నాయకత్వాన్ని ప్రోత్సహించే లక్ష్యంతో చింతకాయల విజయ్‌ను ఎంపిక చేశారు.

రాజకీయంగా ప్రాధాన్యత సంతరించుకున్న ఈ ఎంపికలతో తెదేపా భవిష్యత్ వ్యూహాలు, సామాజిక సమతుల్యతకు ప్రాధాన్యం ఇచ్చినట్లు స్పష్టమవుతోందని విశ్లేషకులు అభిప్రాయపడుతున్నారు.