భారత వైమానిక దళంలో అధికారుల ఉద్యోగాలకు నోటిఫికేషన్

దేశ సేవతో పాటు ప్రతిష్ఠాత్మక కెరీర్‌ను నిర్మించుకోవాలనుకునే యువతకు భారత వైమానిక దళం (Indian Air Force) మరోసారి సువర్ణావకాశాన్ని అందిస్తోంది. ఎయిర్ ఫోర్స్ కామన్ అడ్మిషన్ టెస్ట్ (AFCAT)-2026(2) ద్వారా ఫ్లయింగ్, గ్రౌండ్ డ్యూటీ టెక్నికల్, గ్రౌండ్ డ్యూటీ నాన్-టెక్నికల్ విభాగాల్లో మొత్తం 379 ఖాళీల భర్తీకి నోటిఫికేషన్ విడుదలైంది.

డిగ్రీ అర్హతతోనే ఈ పోస్టులకు దరఖాస్తు చేసుకునే అవకాశం ఉండటం విశేషం. ఎంపికైన అభ్యర్థులకు అత్యాధునిక శిక్షణ అందించి భారత వైమానిక దళంలో అధికారులుగా నియమిస్తారు. శిక్షణ అనంతరం లెవెల్-10 పే స్కేల్‌తో పాటు వివిధ రకాల అలవెన్సులు, ప్రోత్సాహకాలు, సౌకర్యాలు లభిస్తాయి. వార్షిక సీటీసీ సుమారు రూ.18 లక్షల వరకు ఉండే అవకాశం ఉంది.

ఎంపిక ప్రక్రియలో భాగంగా ముందుగా ఆన్‌లైన్ పరీక్ష నిర్వహిస్తారు. ఇందులో అర్హత సాధించిన వారికి ఎయిర్ ఫోర్స్ సెలక్షన్ బోర్డు ద్వారా స్టేజ్-1, స్టేజ్-2 పరీక్షలు నిర్వహిస్తారు. పైలట్ పోస్టులకు అదనంగా కంప్యూటరైజ్డ్ పైలట్ సెలక్షన్ సిస్టమ్ (CPSS)లో అర్హత సాధించాల్సి ఉంటుంది. అనంతరం వైద్య పరీక్షలు నిర్వహించి తుది ఎంపిక చేస్తారు. ఫ్లయింగ్ బ్రాంచ్ అభ్యర్థులకు 62 వారాల పాటు ప్రత్యేక శిక్షణ అందిస్తారు. ప్రతిభ ఆధారంగా ఫైటర్ పైలట్, ట్రాన్స్‌పోర్ట్ పైలట్, హెలికాప్టర్ పైలట్ విభాగాల్లో శిక్షణ ఇవ్వబడుతుంది. శిక్షణ కాలంలో నెలకు రూ.56,100 స్టైపెండ్ అందజేస్తారు.

ఈసారి గేట్ స్కోర్ ఉన్న ఇంజినీరింగ్ అభ్యర్థులకు ప్రత్యేక అవకాశం కల్పించారు. గ్రౌండ్ డ్యూటీ టెక్నికల్ విభాగంలోని 26 పోస్టులకు గేట్ స్కోర్ ఆధారంగా నేరుగా దరఖాస్తు చేసుకోవచ్చు. వీరికి రాత పరీక్ష మినహాయింపు ఉండటంతో పాటు పరీక్ష ఫీజు కూడా చెల్లించాల్సిన అవసరం లేదు.

ఆన్‌లైన్ దరఖాస్తుల ప్రక్రియ కొనసాగుతుండగా జూన్ 19 వరకు అప్లై చేసుకోవచ్చు. ఆగస్టు 8న పరీక్ష నిర్వహించనున్నారు. హైదరాబాద్, వరంగల్, విజయవాడ, విశాఖపట్నం, తిరుపతి నగరాల్లో పరీక్ష కేంద్రాలు ఏర్పాటు చేయనున్నారు.దేశ రక్షణలో భాగస్వాములు కావాలని, గౌరవప్రదమైన ఉద్యోగంతో పాటు సాహసోపేతమైన కెరీర్‌ను ఎంచుకోవాలని భావించే యువతకు ఏఎఫ్‌క్యాట్‌-2026(2) ఒక అద్భుత అవకాశంగా నిలుస్తోంది.