తెలంగాణలో ఎంపీ సీట్ల జాతర: 17 నుంచి 27కు పెంపు?

తెలంగాణ రాజకీయ ముఖచిత్రాన్ని సమూలంగా మార్చేలా లోక్‌సభ నియోజకవర్గాల పునర్విభజన కసరత్తు ఊపందుకుంటోంది. ప్రస్తుతమున్న 17 స్థానాల సంఖ్య ఏకంగా 26 లేదా 27కు పెరిగే అవకాశం ఉండటంతో రాష్ట్ర రాజకీయాల్లో కొత్త సమీకరణాలు మొదలయ్యాయి.

గ్రేటర్ చుట్టుపక్కలే కొత్త జోరు

మెగా నియోజకవర్గాలు: దేశంలోనే అతిపెద్ద నియోజకవర్గంగా ఉన్న మల్కాజిగిరితో పాటు సికింద్రాబాద్, హైదరాబాద్, భువనగిరి ప్రాంతాల్లో జనాభా సాంద్రత విపరీతంగా పెరిగింది. దీనివల్ల ఈ ప్రాంతాలను విభజించి కొత్తగా 3 లేదా 4 లోక్‌సభ స్థానాలను ఏర్పాటు చేయనున్నారు.

జిల్లా వారీగా అంచనాలు: * ఉమ్మడి ఆదిలాబాద్, నిజామాబాద్, కరీంనగర్ జిల్లాల నుంచి అదనంగా రెండు స్థానాలు.

ఉమ్మడి మెదక్, మహబూబ్‌నగర్ జిల్లాల నుంచి ఒక్కో కొత్త నియోజకవర్గం.

ఖమ్మం, వరంగల్, నల్గొండ ప్రాంతాలను విభజించి మరో ఒకటి లేదా రెండు స్థానాలు వచ్చే అవకాశం ఉంది.

మహిళా రిజర్వేషన్లు: 2 నుంచి 9కి!

ప్రస్తుతం తెలంగాణ నుంచి లోక్‌సభలో కేవలం ఇద్దరు మహిళలు (డీకే అరుణ, కడియం కావ్య) మాత్రమే ఉన్నారు. 33% రిజర్వేషన్లు అమలైతే ఈ సంఖ్య 9కి చేరుతుంది.

పార్టీలకు సవాల్: 2024 ఎన్నికల్లో ప్రధాన పార్టీలు మహిళలకు చాలా తక్కువ టికెట్లు ఇచ్చాయి. కానీ 2029 నాటికి ప్రతి పార్టీ కచ్చితంగా 9 మంది మహిళా అభ్యర్థులను బరిలోకి దించాల్సి ఉంటుంది.

మహిళా ఓటర్ల ప్రభావం: రాష్ట్రవ్యాప్తంగా మహిళా ఓటర్ల సంఖ్య పెరగడం, ఖమ్మం, కరీంనగర్ వంటి జిల్లాల్లో మహిళల ప్రాధాన్యత ఎక్కువగా ఉండటంతో రాజకీయ పార్టీలు ఇప్పటి నుంచే మహిళా నేతలను ప్రోత్సహించాల్సిన పరిస్థితి ఏర్పడింది.

2011 జనాభా లెక్కలే ప్రాతిపదిక

కేంద్రం ప్రస్తుతం 2011 జనాభా లెక్కల ప్రకారం నియోజకవర్గాల పెంపును ప్రతిపాదిస్తోంది. ఉమ్మడి రంగారెడ్డి జిల్లా అప్పట్లో రాష్ట్రంలోనే అత్యధిక జనాభాతో ఉండటంతో, ఆ జిల్లా పరిధిలోనే అత్యధిక మార్పులు జరగనున్నాయి.