భారత సైన్యానికి తెలంగాణ టెక్నాలజీ బలం.. డ్రోన్ యుద్ధాలకు కొత్త పరిష్కారాలు

భవిష్యత్ యుద్ధాల్లో డ్రోన్ల వినియోగం భారీగా పెరుగుతున్న నేపథ్యంలో, తెలంగాణ ప్రభుత్వం ఆధ్వర్యంలోని ప్రోటోటైపింగ్ మరియు ఇన్నోవేషన్ కేంద్రం T-Works రక్షణ రంగానికి కొత్త సాంకేతిక పరిష్కారాలను అభివృద్ధి చేస్తోంది. ఇటీవల భారత్-పాకిస్థాన్, రష్యా-ఉక్రెయిన్, ఇజ్రాయెల్-ఇరాన్ యుద్ధాల్లో డ్రోన్ ఆధారిత దాడులు పెరగడంతో, తక్కువ ఖర్చుతో సమర్థవంతమైన యాంటీ డ్రోన్ వ్యవస్థల అవసరం మరింత పెరిగింది.

ఈ నేపథ్యంలో టి-వర్క్స్ రూపొందించిన “యాంటీ డ్రోన్ బుల్లెట్” డ్రోన్‌ను గాల్లోనే అడ్డుకునే కొత్త కాన్సెప్ట్‌గా అభివృద్ధి చేశారు. లక్ష్యానికి చేరగానే బుల్లెట్ ఐదు భాగాలుగా విడిపోయి డ్రోన్ చలనం ఉన్న పరిధిని కవర్ చేసేలా దాడి చేస్తుంది. దీంతో డ్రోన్‌ను తాకే అవకాశాలు 30% నుంచి దాదాపు 80% వరకు పెరుగుతాయని పరిశోధనలు చెబుతున్నాయి.

తక్కువ ఖర్చుతో పనిచేసే ఈ సాంకేతికత, సంప్రదాయ మిస్సైల్ లేదా ఎలక్ట్రానిక్ వార్‌ఫేర్ సిస్టమ్స్‌కు ప్రత్యామ్నాయంగా ఉపయోగపడే అవకాశం ఉంది. ఈ ఆవిష్కరణలపై భారత సైన్యం యొక్క వెస్ట్రన్ మిలిటరీ కమాండ్ ఆసక్తి చూపించి ఒప్పందాలు కూడా కుదుర్చుకుంది.అంతేకాకుండా టి-వర్క్స్ ఎకోసిస్టమ్‌లో భాగంగా సైనికుల కోసం ప్రత్యేక ప్యాకేజింగ్ సిస్టమ్స్, సౌరశక్తితో పనిచేసే మొబైల్ కిచెన్, అటానమస్ గ్రౌండ్ వెహికిల్స్, ఫ్లైట్ సిమ్యులేటర్లు వంటి అనేక ప్రాజెక్టులు అభివృద్ధి చేస్తున్నారు. ఆయుధాలు, నైట్ విజన్ పరికరాలు, రాకెట్ లాంచర్లు వంటి వాటిని సురక్షితంగా తరలించేందుకు “ప్రిసిషన్ కట్ కంపార్ట్‌మెంట్స్” కూడా రూపొందించారు.

మానసిక ఒత్తిడిని తగ్గించే wearable పరికరాలు, వేగంగా వాహనాలకు పెయింటింగ్ చేసే ఇంక్‌జెట్ పెయింట్ బూత్ సిస్టమ్, ల్యాండ్‌మైన్ నియంత్రణకు ఎలక్ట్రానిక్ డిటోనేటర్లు వంటి ఆవిష్కరణలు కూడా ఇందులో ఉన్నాయి.మొత్తం మీద, హైదరాబాద్‌ను రక్షణ తయారీ మరియు డీప్‌టెక్ ఇన్నోవేషన్ హబ్‌గా మార్చే దిశగా టి-వర్క్స్ చేస్తున్న ప్రయత్నాలు దేశ రక్షణ వ్యవస్థకు కొత్త బలాన్ని ఇస్తున్నాయి.