యుద్ధం ముగింపునకు 'ట్రంప్' ముహూర్తం: ఇరాన్‌తో శాంతి ఒప్పందానికి సర్వం సిద్ధం!

మధ్యప్రాచ్యంలో నెలకొన్న యుద్ధ మేఘాలు త్వరలోనే తొలగిపోతాయన్న ఆశాభావాన్ని అమెరికా అధ్యక్షుడు డొనాల్డ్ ట్రంప్ వ్యక్తం చేశారు. ఇరాన్‌తో నెలకొన్న ఉద్రిక్తతలు ముగింపు దశకు చేరుకున్నాయని, శాశ్వత శాంతి ఒప్పందం కోసం తాము అత్యంత చేరువగా ఉన్నామని ఆయన సంచలన వ్యాఖ్యలు చేశారు.

ట్రంప్ వ్యాఖ్యల్లోని ముఖ్యాంశాలు:

యుద్ధం ముగిసినట్లే: ఇరాన్‌తో ఘర్షణ దాదాపు ముగింపునకు వచ్చిందని, ఇరాన్ కూడా ఒప్పందం కోసం తీవ్రంగా ప్రయత్నిస్తోందని ట్రంప్ పేర్కొన్నారు. తమ సైనిక చర్య వల్ల ఇరాన్ అణ్వస్త్రాలను తయారు చేసుకోలేకపోయిందని ఆయన గుర్తుచేశారు.

చమురు ధరల తగ్గుదల: శాంతి ఒప్పందం కుదిరిన వెంటనే ప్రపంచ మార్కెట్‌లో చమురు ధరలు భారీగా తగ్గుతాయని ఆయన హామీ ఇచ్చారు.

చైనా మద్దతు: ఇరాన్‌కు ఆయుధాలు సరఫరా చేయబోమని చైనా అధ్యక్షుడు జిన్‌పింగ్ తనకు లేఖ ద్వారా స్పష్టం చేశారని ట్రంప్ వెల్లడించారు. తన రాబోయే చైనా పర్యటనపై యుద్ధ ప్రభావం ఉండదని ధీమా వ్యక్తం చేశారు.

మధ్యవర్తుల రాయబారం: అమెరికా-ఇరాన్ మధ్య రెండో విడత చర్చల కోసం పాకిస్థాన్ సైన్యాధిపతి అసీం మునీర్ నేతృత్వంలోని బృందం టెహ్రాన్‌కు చేరుకుంది. ఈ నెల 22తో ముగియనున్న కాల్పుల విరమణను మరో రెండు వారాలు పొడిగించి, ఈలోపు శాశ్వత పరిష్కారాన్ని కనుగొనాలని మధ్యవర్తులు ప్రయత్నిస్తున్నారు. యురేనియం శుద్ధి ప్రణాళికలపై చర్చించేందుకు ఇరాన్ సిద్ధమని ప్రకటించినప్పటికీ, తమ అవసరాలకు తగినట్లుగా అనుమతించాలని కోరుతోంది.

హెచ్చరికలు – వివాదాలు: మరోవైపు, ఇరాన్ ఓడరేవులపై అమెరికా దిగ్బంధాన్ని కొనసాగిస్తుండటంపై టెహ్రాన్ తీవ్రంగా స్పందించింది. దిగ్బంధాన్ని ఎత్తివేయకపోతే పర్షియన్ గల్ఫ్, ఎర్రసముద్రం మీదుగా జరిగే అంతర్జాతీయ వాణిజ్యాన్ని అడ్డుకుంటామని హెచ్చరించింది. ఇక పోప్ లియో-14పై ట్రంప్ తన విమర్శలను కొనసాగించారు. ఇరాన్‌లో 42 వేల మంది నిరసనకారులను చంపిన విషయాన్ని పోప్‌కు ఎవరైనా చెప్పాలని సోషల్ మీడియాలో పోస్ట్ చేశారు.