ఇరాన్‌పై అమెరికా ద్వంద్వ వైఖరి.. ఒమన్‌లో చర్చలు, చమురు వ్యాపారంపై ఆంక్షలు

అమెరికా–ఇరాన్ మధ్య ఒమన్ వేదికగా చర్చలు ప్రారంభమైన వేళ, అదే సమయంలో ఇరాన్‌పై అమెరికా కొత్త ఆంక్షలు విధించడం అంతర్జాతీయంగా ప్రాధాన్యం సంతరించుకుంది. చర్చలు జరుగుతూనే, ఇరాన్ చమురు వ్యాపారాన్ని లక్ష్యంగా చేసుకుని అమెరికా చర్యలు చేపట్టడం గమనార్హంగా మారింది.

ఇరాన్‌తో ముడిచమురు వ్యాపారం నిర్వహిస్తున్న 15 సంస్థలు, 14 రహస్య నౌకలపై ఆంక్షలు విధించినట్లు అమెరికా విదేశాంగ శాఖ ప్రకటించింది. ఈ చమురు వ్యాపారం ద్వారా వచ్చే ఆదాయాన్ని ఇరాన్ విదేశాల్లో ఉగ్రవాదానికి మద్దతు ఇవ్వడానికి, అలాగే దేశంలో తమ పౌరులను అణచివేయడానికి వినియోగిస్తున్నదని అమెరికా ఆరోపించింది. అందుకే ఇరాన్ ఆదాయ మార్గాలను అడ్డుకునే చర్యల్లో భాగంగానే ఈ ఆంక్షలు విధించినట్లు వెల్లడించింది.ముడి చమురు, పెట్రోలియం ఉత్పత్తులు, పెట్రోకెమికల్ రంగానికి సంబంధించిన వ్యాపార నెట్‌వర్క్‌పై తమ చర్యలు కొనసాగుతాయని అమెరికా స్పష్టం చేసింది. పశ్చిమాసియాలో ఇప్పటికే ఉద్రిక్త పరిస్థితులు నెలకొన్న నేపథ్యంలో, ఈ ఆంక్షలు మరింత రాజకీయ ఉద్రిక్తతలకు దారితీయవచ్చని నిపుణులు అభిప్రాయపడుతున్నారు.

ఇదిలా ఉండగా, ఒమన్‌లో అమెరికా ప్రతినిధులతో ప్రారంభమైన చర్చలను ఇరాన్ విదేశాంగ మంత్రి అబ్బాస్ అరాఘ్చీ ‘చాలా మంచి ఆరంభం’గా అభివర్ణించారు. అణు కార్యక్రమంపై భవిష్యత్ సంప్రదింపులకు బాటలు వేయడమే ప్రాథమిక లక్ష్యమని ఆయన తెలిపారు. చర్చల ద్వారా సమస్యలకు పరిష్కారం దొరుకుతుందనే ఆశాభావాన్ని వ్యక్తం చేశారు.

మరోవైపు, ఇరాన్‌తో అణు ఒప్పందం కుదుర్చుకునేలా అమెరికా ఒత్తిడి కొనసాగుతోంది. ఒకవేళ ఒప్పందం కుదరకపోతే దాని పరిణామాలు తీవ్రంగా ఉంటాయని అమెరికా అధ్యక్షుడు డొనాల్డ్ ట్రంప్ హెచ్చరించారు. ఒప్పందంపై టెహ్రాన్ ఆసక్తిగా ఉందని వ్యాఖ్యానించిన ట్రంప్, అవసరమైతే తమ నౌకాదళం ఎలా స్పందిస్తుందో చూడాల్సి ఉంటుందని భిన్న సంకేతాలు ఇచ్చారు.ఇరాన్ అణ్వాయుధాల అభివృద్ధికి ఎలాంటి ప్రయత్నాలు చేయకూడదనే షరతును అమెరికా మరోసారి పునరుద్ఘాటించింది. చర్చలు, ఆంక్షలు ఒకేసారి కొనసాగుతుండటంతో, ఇరాన్–అమెరికా సంబంధాల్లో ముందున్న దారి ఏ దిశగా వెళ్లబోతోందన్న ఆసక్తి అంతర్జాతీయంగా నెలకొంది.