రూ.లక్షలు వెచ్చించి వాహనం కొనుగోలు చేసిన తర్వాత దానికి మరింత అందం, సౌకర్యం, రక్షణ ఉంటుందని భావించి అదనపు ఉపకరణాలు బిగించుకోవడం సాధారణంగా మారింది. షోరూం సిబ్బంది సూచించారనో, యాక్సెసరీస్ దుకాణదారులు తప్పనిసరి అన్నారనో కొందరు ఆలోచించకుండా వాటిని అమర్చుకుంటున్నారు. అయితే ప్రతి ఉపకరణం వాహనానికి, ప్రయాణికులకు ఉపయోగకరమేనని భావించడం సరికాదని ఆటోమొబైల్ నిపుణులు హెచ్చరిస్తున్నారు.
కొన్ని మార్పులు వాహనం అసలు రూపకల్పన, బరువు సమతౌల్యం, డ్రైవర్ దృశ్యమానత, భద్రతా వ్యవస్థలపై ప్రభావం చూపుతాయి. మరికొన్ని నేరుగా నిబంధనలకు విరుద్ధంగా ఉంటాయి. రోడ్డుపై పోలీసులు తనిఖీ చేసినప్పుడు జరిమానాలు ఎదురయ్యే పరిస్థితి కూడా ఉంటుంది. ప్రమాదం జరిగినప్పుడు కొన్ని మార్పుల వల్ల వాహనంలోని వారికి గాయాల తీవ్రత పెరిగే అవకాశం ఉంది.
కారు ముందు, వెనుక భాగాల్లో అదనపు స్టీల్ బంపర్ రాడ్లు బిగించుకోవడం చాలామందిలో కనిపిస్తుంది. చిన్న ప్రమాదాల్లో కారు దెబ్బతినకుండా ఉంటుందనే ఉద్దేశంతో వీటిని ఏర్పాటు చేసుకున్నా.. ఇవి భద్రతకు ముప్పుగా మారే అవకాశం ఉంది. మోటారు వాహన చట్టంలోని సెక్షన్ 52 ప్రకారం వాహనం తయారీదారు నిర్దేశించిన నిర్మాణంలో అనధికార మార్పులు చేయడం నిబంధనలకు విరుద్ధం.
మెటల్ బంపర్లు ప్రమాద సమయంలో వాహనం రూపొందించిన క్రాష్ భద్రతా వ్యవస్థల పనితీరును ప్రభావితం చేయవచ్చు. ద్విచక్రవాహనదారులకు కూడా ఇవి ప్రమాదకరంగా మారే అవకాశం ఉంది.
వాహన తయారీదారు ఏర్పాటు చేసిన ఫుట్రెస్టులు వాహనం నిర్మాణం, కొలతలకు అనుగుణంగా ఉంటాయి. బయట మార్కెట్లో అదనంగా అమర్చుకునే ఫుట్రెస్టులు, క్రాష్గార్డులు మాత్రం వాహన బరువు, సమతౌల్యంపై ప్రభావం చూపే అవకాశం ఉంది. వాహనం పక్కలకి ఎక్కువగా పొడుచుకొచ్చేలా ఉంటే పక్క నుంచి వెళ్లే ఇతర వాహనాలకు కూడా ప్రమాదం ఏర్పడొచ్చు.
వాహన అద్దాలకు నల్ల ఫిలిం నిషేధం నేపథ్యంలో కొందరు మాగ్నెటిక్ కర్టెన్లు, సన్షేడ్లు వినియోగిస్తున్నారు. అయితే ఇవి డ్రైవర్ చుట్టుపక్కల పరిస్థితులను గమనించడంలో ఇబ్బందులు కలిగించవచ్చు. లేన్ మారే సమయంలో, మలుపులు తీసుకునేటప్పుడు, సైడ్ మిర్రర్ల ద్వారా పరిస్థితిని అంచనా వేసేటప్పుడు దృశ్యమానత తగ్గితే ప్రమాదం జరిగే అవకాశం ఉంటుంది.
వాహనాలను సులభంగా గుర్తించేందుకు ప్రభుత్వం హైసెక్యూరిటీ రిజిస్ట్రేషన్ ప్లేట్లను అమలు చేస్తోంది. నంబర్ ప్లేట్లను వంచడం, అక్షరాలు లేదా అంకెల పరిమాణాన్ని మార్చడం, వాటిపై పేర్లు, గుర్తులు, ఇతర అలంకరణలు ఏర్పాటు చేయడం నిబంధనలకు విరుద్ధం. ప్రమాదం లేదా నేరం జరిగినప్పుడు వాహనాన్ని గుర్తించడంలో ఇలాంటి మార్పులు ఇబ్బందులు కలిగించవచ్చు.
విండ్షీల్డ్, వెనుక అద్దాలపై డ్రైవర్ దృష్టికి ఆటంకం కలిగించే స్టిక్కర్లు, రేడియం అక్షరాలు, అలంకరణలు ఏర్పాటు చేయకూడదు. పీయూసీ, టోల్ వంటి అవసరమైన స్టిక్కర్లను నిర్దేశిత ప్రదేశాల్లో మాత్రమే ఉంచాలి. వెనుక అద్దంపై పెద్ద అక్షరాలతో సందేశాలు లేదా స్టిక్కర్లు వేయడం వల్ల వెనుక వస్తున్న వాహనాలు కనిపించకుండా పోయే ప్రమాదం ఉంది.
“వాహనానికి ఎలాంటి అదనపు ఉపకరణాలు బిగించినా.. అవి దాని అసలు నిర్మాణం, వేగం, సమతౌల్యం, భద్రతను ప్రభావితం చేయకూడదు. పక్కకు ఎక్కువగా పొడుచుకొచ్చే ఫుట్రెస్టులు ఇతర వాహనాలకు తగిలే ప్రమాదం ఉంది. ఇలాంటి అనధికార మార్పుల కారణంగా కొన్ని సందర్భాల్లో బీమా క్లెయిమ్లపైనా సమస్యలు రావచ్చు. యాక్సెసరీస్ వాహనానికి, ప్రయాణికులకు, ఇతర వాహనదారులకు సౌకర్యంగా ఉండాలి తప్ప ఇబ్బందిగా మారకూడదు” అని జేటీసీ వెంకటరమణ సూచించారు.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews Wellness WorldNews
