భారత ప్రైవేటు రాకెట్‌ ‘విక్రమ్‌-1’ ప్రయోగానికి సన్నద్ధం

భారత అంతరిక్ష రంగంలో ప్రైవేటు రంగ భాగస్వామ్యానికి మరో కీలక మైలురాయి ఏర్పడనుంది. దేశీయంగా అభివృద్ధి చేసిన తొలి ప్రైవేటు ఆర్బిటాల్‌ క్లాస్‌ రాకెట్‌ ‘విక్రమ్‌-1’ ప్రయోగానికి స్కైరూట్‌ ఏరోస్పేస్‌ సిద్ధమైంది. శ్రీహరికోటలోని సతీశ్‌ ధవన్‌ అంతరిక్ష కేంద్రం (షార్‌) నుంచి ఈ ప్రయోగాత్మక పరీక్ష నిర్వహించనున్నారు.

ఈ ప్రయోగం విజయవంతం కావాలని ప్రధానమంత్రి నరేంద్రమోదీ ఆకాంక్షించారు. స్పేస్‌టెక్‌ స్టార్టప్‌ స్కైరూట్‌ ఏరోస్పేస్‌కు శుభాకాంక్షలు తెలిపిన ప్రధాని.. భారత యువత ప్రతిభ, ఆవిష్కరణల శక్తికి ఈ ప్రయోగం నిదర్శనమని పేర్కొన్నారు. అంతరిక్ష రంగంలో సంస్కరణలు, ప్రైవేటు పెట్టుబడులకు ఇది కొత్త అవకాశాలను తెరుస్తుందని అన్నారు.

‘విక్రమ్‌-1’ రాకెట్‌లో పలు సాంకేతిక పేలోడ్లను పంపిస్తున్నారు. ఇందులో ప్రధాని మోదీ తన చేతిరాతతో రాసిన ‘వందేమాతరం’ సందేశంతో కూడిన ప్రత్యేక పోస్ట్‌కార్డు కూడా ఉంది. అంతేకాకుండా కాస్మోస్‌ డైమండ్స్‌ సంస్థ రూపొందించిన ‘కాస్మిక్‌ బ్లూమ్‌’ కళాకృతి కూడా అంతరిక్ష ప్రయాణంలో భాగం కానుంది.

ఈ ప్రయోగంలో ప్రత్యేక ఆకర్షణగా విక్రమ్‌-1 రాకెట్‌ సూక్ష్మ నమూనాను కూడా పంపిస్తున్నారు. దానిపై భారత శాస్త్రవేత్తలు సర్‌ సీవీ రామన్‌, విక్రమ్‌ సారాభాయ్‌, డాక్టర్‌ ఏపీజే అబ్దుల్‌ కలాం సూక్ష్మ చిత్రాలను చెక్కారు. భారత అంతరిక్ష ప్రస్థానానికి సేవలందించిన మహనీయులకు నివాళిగా ఈ నమూనాను రూపొందించారు.

స్కైరూట్‌ ఏరోస్పేస్‌ అభివృద్ధి చేసిన విక్రమ్‌ సిరీస్‌ రాకెట్లు చిన్న ఉపగ్రహాలను కక్ష్యలోకి ప్రవేశపెట్టే లక్ష్యంతో రూపొందించబడ్డాయి. ప్రైవేటు సంస్థలు కూడా అంతరిక్ష పరిశోధనల్లో కీలక పాత్ర పోషించేలా దేశంలో ఏర్పడుతున్న కొత్త వాతావరణానికి ఈ ప్రయోగం ప్రతీకగా నిలవనుంది.

విక్రమ్‌-1 ప్రయోగం విజయవంతమైతే భారత ప్రైవేటు అంతరిక్ష రంగానికి మరింత ఊతం లభించడంతో పాటు, భవిష్యత్తులో ఉపగ్రహ ప్రయోగ సేవలకు కొత్త అవకాశాలు అందుబాటులోకి వచ్చే అవకాశం ఉంది.