వొడాఫోన్ ఐడియా నుంచి కొత్త వార్షిక ప్రీపెయిడ్ ప్లాన్ లాంచ్

ప్రముఖ టెలికాం కంపెనీ వొడాఫోన్ ఐడియా వినియోగదారుల కోసం కొత్త ప్రీపెయిడ్ ప్లాన్లను ప్రకటించింది. ఇందులో ప్రధానంగా రూ.4,600 ధరతో వార్షిక ప్రీపెయిడ్ ప్లాన్‌ను ప్రవేశపెట్టింది. ఈ ప్లాన్ ద్వారా దేశవ్యాప్తంగా 4జీ, 5జీ యూజర్లకు అపరిమిత కాల్స్, అపరిమిత డేటా సౌకర్యం అందించనున్నట్లు కంపెనీ తెలిపింది.

ఈ ప్లాన్ 365 రోజుల వ్యాలిడిటీతో అందుబాటులో ఉంటుంది. రోజుకు అపరిమిత కాల్స్, అపరిమిత డేటా, అలాగే 100 ఎస్సెమ్మెస్‌లు లభిస్తాయి. అయితే ఇది వ్యక్తిగత, నాన్-కమర్షియల్ వినియోగానికి మాత్రమే వర్తిస్తుందని కంపెనీ స్పష్టం చేసింది. 5జీ నెట్‌వర్క్ అందుబాటులో ఉన్న ప్రాంతాల్లో అపరిమిత 5జీ డేటా ఉపయోగించుకోవచ్చు.

డేటా వినియోగంపై ప్రత్యేక నిబంధనలు కూడా అమల్లో ఉన్నాయి. రోజువారీ పరిమితి లేకపోయినప్పటికీ, 28 రోజుల కాలానికి గరిష్ఠంగా 300 జీబీ వరకు మాత్రమే హై-స్పీడ్ డేటా వినియోగించుకోవచ్చు. ఆ పరిమితి దాటిన తర్వాత వేగం తగ్గుతుందని కంపెనీ తెలిపింది. ఈ ప్లాన్ రోజుకు సుమారు రూ.12.6 ఖర్చుతో సమానమవుతుంది.

అదే విధంగా వొడాఫోన్ ఐడియా మరో మధ్యకాలిక ప్లాన్‌ను కూడా తీసుకొచ్చింది. 180 రోజుల వ్యాలిడిటీతో రూ.2,475 ధర గల ఈ ప్రీపెయిడ్ ప్లాన్‌లోనూ అపరిమిత కాల్స్, అపరిమిత డేటా, రోజుకు 100 ఎస్సెమ్మెస్‌లు అందుబాటులో ఉంటాయి. ఈ ప్లాన్‌కూ డేటా వినియోగ పరిమితులు వర్తిస్తాయని కంపెనీ పేర్కొంది.