40 నిమిషాల నిశ్శబ్దం..భూమితో తెగిపోయిన బంధం: చంద్రుడి వెనుక వైపు ఓరియన్ సాహసం!

నాసా ప్రతిష్ఠాత్మకంగా చేపట్టిన ఆర్టెమిస్-2 (Artemis 2) మిషన్ విజయవంతంగా చంద్రుడి చుట్టూ తన ప్రయాణాన్ని ముగించుకుని భూమికి తిరుగుపయనమైంది. 1972 తర్వాత అంటే దాదాపు 50 ఏళ్ల విరామం అనంతరం మానవులను చంద్రుడి దరిదాపుల్లోకి తీసుకెళ్లిన ఈ చారిత్రాత్మక యాత్రకు సంబంధించిన మరిన్ని తాజా విశేషాలు..

చంద్రుడి వెనుక వైపు ‘నిశ్శబ్దం’: ఓరియన్ నౌక చంద్రుడి వెనుక భాగానికి (Far side of the Moon) వెళ్లినప్పుడు భూమితో ఉన్న రేడియో సంబంధాలు పూర్తిగా తెగిపోయాయి. దాదాపు 40 నిమిషాల పాటు వ్యోమగాములు బాహ్య ప్రపంచంతో ఎలాంటి సంబంధం లేకుండా అంతరిక్షంలో ప్రయాణించారు. ఆ సమయంలో వారు అత్యంత అద్భుతమైన చంద్రుడి ఉపరితల చిత్రాలను, అరుదైన దృశ్యాలను కెమెరాల్లో బంధించారు. మళ్లీ భూమితో సిగ్నల్స్ పునరుద్ధరణ అయినప్పుడు వ్యోమగామి క్రిస్టినా కోచ్ తన ఆనందాన్ని వ్యక్తం చేస్తూ, “భూమి నుంచి మళ్లీ మాటలు వినడం అద్భుతంగా ఉంది” అని వ్యాఖ్యానించారు.

అంతరిక్షం నుంచి సూర్యగ్రహణం: తిరుగు ప్రయాణంలో వ్యోమగాములకు మరో అరుదైన అదృష్టం లభించింది. వారు అంతరిక్షం నుండే సంపూర్ణ సూర్యగ్రహణాన్ని (Total Solar Eclipse) వీక్షించారు. భూమి మీద పడుతున్న చంద్రుడి నీడను వారు పైనుంచి గమనించారు. ఈ దృశ్యం మానవ చరిత్రలో మరెవరూ చూడని విధంగా ఉందని, దీనిని వర్ణించడానికి పదాలు సరిపోవని పైలట్ విక్టర్ గ్లోవర్ ఉద్వేగానికి లోనయ్యారు.

ట్రంప్ ప్రశంసలు – వైట్ హౌస్ ఆహ్వానం: అమెరికా అధ్యక్షుడు డొనాల్డ్ ట్రంప్ ఈ మిషన్ విజయం పట్ల హర్షం వ్యక్తం చేస్తూ వ్యోమగాములకు ‘సర్‌ప్రైజ్ కాల్’ చేశారు. అంతరిక్షంలో ఉన్న వ్యోమగాములతో నేరుగా మాట్లాడిన ట్రంప్, వారు అమెరికా గర్వించదగ్గ పని చేశారని కొనియాడారు. భూమితో సంబంధాలు తెగిపోయిన ఆ 40 నిమిషాల ఉత్కంఠ గురించి ఆరా తీశారు. ఈ మిషన్ ముగిసి భూమికి తిరిగి వచ్చిన తర్వాత, ఈ నలుగురు వ్యోమగాములను (రీడ్ వైస్‌మన్, విక్టర్ గ్లోవర్, క్రిస్టినా కోచ్, జెరెమీ హాన్సెన్) ప్రత్యేకంగా అభినందించేందుకు వైట్ హౌస్‌కు ఆహ్వానించనున్నట్లు ట్రంప్ ప్రకటించారు.