స్మార్ట్‌ఫోన్‌తో ఓటు… బిహార్‌లో డిజిటల్ విప్లవం!

డిజిటల్ ప్రజాస్వామ్యం దిశగా బిహార్‌ రాష్ట్ర ఎన్నికల సంఘం కీలక ముందడుగు వేసింది. ఏఐ ఇంపాక్ట్ సమిట్ 2026లో కృత్రిమ మేధ ఆధారిత ఇ-ఓటింగ్ విధానాన్ని ప్రదర్శించి అందరి దృష్టిని ఆకర్షించింది. ఇప్పటికే మున్సిపల్ ఉపఎన్నికల్లో అమలు చేసిన ఈ పద్ధతిని రాబోయే శాసనసభ ఎన్నికలకూ విస్తరించాలన్న లక్ష్యంతో ముందుకెళ్తోంది. ఇది విజయవంతమైతే ఇతర రాష్ట్రాలకూ మార్గదర్శకంగా నిలిచే అవకాశం ఉంది.

ఇ-ఓటింగ్ ఎందుకు?

ప్రస్తుతం ఉద్యోగాలు, విద్య కోసం వలసలు పెరిగాయి. పోలింగ్ రోజున స్వగ్రామానికి చేరుకోవడం చాలామందికి సాధ్యంకాదు. వృద్ధులు, గర్భిణీలు, వికలాంగులు పోలింగ్ బూత్‌కు రావడం కష్టమే. ఇలాంటి వారందరికీ స్మార్ట్‌ఫోన్ ద్వారానే ఓటు హక్కు వినియోగించేలా ప్రత్యేక మొబైల్ యాప్‌ను రూపొందించింది బిహార్ ఎన్నికల సంఘం.

ఓటు నమోదు నుంచి ఓటు వేయడం వరకూ మొత్తం ప్రక్రియ డిజిటల్ రూపంలోనే పూర్తవుతుంది.

భద్రతే ప్రధాన లక్ష్యం

ఆధార్‌కు బదులుగా ఎలక్షన్ ఫొటో ఐడెంటిటీ కార్డు (EPIC) డేటాబేస్‌తో ధృవీకరణ

ఫేషియల్ రికగ్నిషన్, లైవ్ వెరిఫికేషన్

పరికరం స్థాయి అథెంటికేషన్

బ్లాక్‌చెయిన్ ఆధారిత ఎన్‌క్రిప్షన్

స్మార్ట్ కాంట్రాక్ట్ వ్యవస్థ (డిజిటల్ ఈవీఎంలా పని)

టూ ఫ్యాక్టర్ అథెంటికేషన్, డిజిటల్ సిగ్నేచర్ ధృవీకరణ

ప్రతి ఓటు ఎన్‌క్రిప్ట్ అయి బ్లాక్‌చెయిన్‌లో రికార్డ్ అవుతుంది. వేసిన ఓటును మార్చే అవకాశమే ఉండదు. ఓటింగ్ నుంచి లెక్కింపు వరకూ ప్రక్రియ గోప్యంగా, పారదర్శకంగా సాగుతుంది.

ఓటింగ్ విధానం ఇలా

అధికారిక యాప్ డౌన్‌లోడ్
ఓటీపీ ద్వారా మొబైల్ ధృవీకరణ
EPIC వివరాల నమోదు
ఫేషియల్ రికగ్నిషన్ ద్వారా గుర్తింపు
డిజిటల్ బ్యాలెట్‌లో ఓటు నమోదు

సవాళ్లు కూడా ఉన్నాయి

వృద్ధులకు, తొలిసారి ఓటర్లకు యాప్ వినియోగంపై అవగాహన అవసరం
అధికారులకు ప్రత్యేక శిక్షణ
పాత ఫొటోలతో ఫేషియల్ రికగ్నిషన్‌లో ఇబ్బందులు
ఇంటర్నెట్ సమస్యలు

అయితే నమూనా ఓటింగ్, పారదర్శక విధానాల ద్వారా రాజకీయ పార్టీల నమ్మకాన్ని పొందే ప్రయత్నం జరుగుతోంది.

ఏఐ ఆధారిత లెక్కింపు

ఏఐ-ఆధారిత OCR వ్యవస్థ ఈవీఎం డేటాను వెంటనే సంగ్రహించి ధృవీకరిస్తుంది. వీడియో రికార్డులు, టైమ్-స్టాంప్ ఆడిట్ లాగ్స్ ద్వారా ప్రతి దశను పరిశీలించవచ్చు. ఫలితాలు వేగంగా వెలువడేలా సిస్టమ్ రూపొందించారు.

మున్సిపల్, పంచాయతీ ఎన్నికల్లో ఇప్పటికే ఈ విధానం ప్రయోగాత్మకంగా అమలు చేసి విజయాన్ని సాధించారు.