కొత్త ఫీచర్లతో హ్యుందాయ్ వెర్నా.. కార్ ప్రేమికులకు గుడ్ న్యూస్!!

ప్రముఖ ఆటోమొబైల్ సంస్థ హ్యుందాయ్ ఇండియా తన ప్రముఖ సెడాన్ వెర్నాకు 2026 మోడల్‌ను భారత మార్కెట్లో విడుదల చేసింది. నూతన స్టైలింగ్‌, అధునాతన ఫీచర్లతో ఈ కారు మరింత ఆకర్షణీయంగా రూపొందించినట్లు కంపెనీ వెల్లడించింది. కొత్త వెర్నా ప్రారంభ ధర రూ.10.98 లక్షలు (ఎక్స్‌-షోరూమ్) గా నిర్ణయించారు.

ఈ కొత్త మోడల్‌లో మెరుగైన డిజైన్‌తో పాటు అత్యాధునిక సౌండ్ సిస్టమ్‌, ప్రీమియం ఇంటీరియర్ ఫీచర్లను అందించారు. వెర్నా 2026 ఫేస్‌లిఫ్ట్‌ను HX2 (రూ.10.98 లక్షలు), HX4 (రూ.12.25 లక్షలు), HX6 (రూ.13.19–14.40 లక్షలు), HX6+ (రూ.13.81–15.02 లక్షలు), HX8 (రూ.14.88–17.62 లక్షలు), HX10 (రూ.17.15–18.25 లక్షలు) వంటి పలు వేరియంట్లలో అందుబాటులోకి తీసుకొచ్చారు.

ఇంజిన్ విషయానికి వస్తే… ఈ కారు 1.5 లీటర్ నేచురల్లీ ఆస్పిరేటెడ్ పెట్రోల్ ఇంజిన్తో పాటు 1.5 లీటర్ టర్బో పెట్రోల్ ఇంజిన్ ఆప్షన్లలో లభిస్తుంది. ట్రాన్స్‌మిషన్‌గా 6-స్పీడ్ మాన్యువల్, CVT, అలాగే 7-స్పీడ్ డ్యూయల్ క్లచ్ ట్రాన్స్‌మిషన్ (DCT) ఎంపికలు అందుబాటులో ఉన్నాయి.

భద్రతా ఫీచర్ల పరంగా కూడా ఈ కారులో అనేక ఆధునిక సౌకర్యాలు ఉన్నాయి. 360 డిగ్రీ కెమెరా విత్ బ్లైండ్ వ్యూ మానిటర్, 7 ఎయిర్‌బ్యాగ్‌లు, లెవెల్ 2 ADAS, ఎలక్ట్రానిక్ స్టెబిలిటీ కంట్రోల్, ఆల్ వీల్ డిస్క్ బ్రేక్స్, ఫ్రంట్-రియర్ పార్కింగ్ సెన్సార్లు, ఎలక్ట్రానిక్ పార్కింగ్ బ్రేక్ విత్ ఆటో హోల్డ్, టైర్ ప్రెజర్ మానిటరింగ్ సిస్టమ్ వంటి భద్రతా ఫీచర్లు ఉన్నాయి.

అలాగే సౌకర్యాల పరంగా 10.25 అంగుళాల టచ్‌స్క్రీన్ ఇన్ఫోటెయిన్‌మెంట్ సిస్టమ్, వైర్‌లెస్ ఆండ్రాయిడ్ ఆటో – యాపిల్ కార్‌ప్లే, 10.25 అంగుళాల డిజిటల్ ఇన్‌స్ట్రుమెంట్ క్లస్టర్, మల్టీకలర్ అంబియంట్ లైటింగ్, వెంటిలేటెడ్ ఫ్రంట్ సీట్లు, ఎలక్ట్రిక్ సన్‌రూఫ్, ఆటోమేటిక్ క్లైమేట్ కంట్రోల్, ఎయిర్ ప్యూరిఫయర్ వంటి ప్రీమియం ఫీచర్లు ఉన్నాయి.

భారత మార్కెట్లో ఈ కొత్త హ్యుందాయ్ వెర్నా 2026 సెడాన్‌కు హోండా సిటీ, ఫోక్స్‌వ్యాగన్ వర్చూస్, స్కోడా స్లేవియా వంటి కార్లు ప్రధాన పోటీగా ఉండనున్నాయి.