వామ్మో..! ఇలాంటి ఛార్జర్లు వాడితే సిమ్‌ కార్డు పాడవుతుందట!!

స్మార్ట్‌ఫోన్‌ల వినియోగం పెరిగిన ఈ కాలంలో సిమ్‌ కార్డ్ మన డిజిటల్ జీవితంలో కీలక పాత్ర పోషిస్తోంది. సాధారణంగా సిమ్‌ కార్డులు సులభంగా దెబ్బతినవు. కానీ కొన్ని చిన్న పొరపాట్లు, ముఖ్యంగా నాణ్యత లేని ఛార్జర్లు లేదా సరైన వినియోగం లేకపోవడం వల్ల సిమ్‌ కార్డు పనిచేయకుండా పోయే ప్రమాదం ఉంది. టెక్‌ నిపుణులు చెబుతున్న కొన్ని ముఖ్య కారణాలు ఇవి.

తేమ ప్రభావం
ఫోన్‌లోకి తేమ లేదా ఆవిరి చేరితే సిమ్‌లో ఉన్న బంగారు పూత కలిగిన చిప్‌పై ఆక్సీకరణ జరుగుతుంది. దీని వల్ల ఫోన్ మరియు సిమ్ మధ్య విద్యుత్ కనెక్షన్ దెబ్బతిని నెట్‌వర్క్ సమస్యలు రావచ్చు. చెమట పట్టిన చేతులతో ఫోన్ ఉపయోగించడం లేదా తేమ ఎక్కువగా ఉండే ప్రదేశాల్లో ఉండడం కూడా దీనికి కారణమవుతుంది.

అధిక ఉష్ణోగ్రత
సిమ్‌ కార్డ్ ప్లాస్టిక్ మరియు చిన్న సిలికాన్ చిప్‌తో తయారవుతుంది. ఎక్కువసేపు గేమింగ్ చేయడం, ఎండలో ఫోన్ వాడటం వంటి కారణాలతో ఫోన్ వేడెక్కితే సిమ్ ట్రే ఉష్ణోగ్రత కూడా పెరుగుతుంది. దీని వల్ల సిమ్‌లోని సర్క్యూట్‌ దెబ్బతినే అవకాశం ఉంది.

నాణ్యత లేని ఛార్జర్లు
మార్కెట్లో లభించే చవక లేదా నకిలీ ఛార్జర్లు వాడితే వోల్టేజ్ హెచ్చుతగ్గులు ఏర్పడవచ్చు. ఛార్జింగ్ సమయంలో వచ్చే వోల్టేజ్ స్పైక్ ఫోన్ మదర్‌బోర్డ్ ద్వారా సిమ్ ట్రేకు చేరి సిమ్ మెమరీని దెబ్బతీసే ప్రమాదం ఉంది. అందుకే ఎప్పుడూ ఫోన్‌కు సంబంధించిన ఒరిజినల్ లేదా బ్రాండెడ్ ఛార్జర్‌నే ఉపయోగించడం మంచిది.

చిప్‌పై ఒత్తిడి, వాడుక
ఒకే సిమ్‌ను చాలా సంవత్సరాలు ఉపయోగిస్తే దాని మెటల్ కాంటాక్ట్‌లు అరిగిపోతాయి. ఫోన్ వైబ్రేషన్ లేదా చిన్న కదలికల వల్ల కూడా సిమ్ చిప్‌పై ఘర్షణ ఏర్పడి నెట్‌వర్క్ సమస్యలు రావచ్చు.