కేరళ ఎన్నికలపై ఇరాన్ యుద్ధ ప్రభావం

పశ్చిమాసియా ఉద్రిక్తతలు కేవలం చమురు ధరలపైనే కాకుండా దేశీయ రాజకీయాలపైనా ప్రభావం చూపే పరిస్థితి నెలకొంది. ముఖ్యంగా ఏప్రిల్ 9న జరగనున్న కేరళ అసెంబ్లీ ఎన్నికలపై ఈ ప్రభావం స్పష్టంగా కనిపించే అవకాశముంది.

కేరళ రాష్ట్రానికి చెందిన లక్షలాది మంది గల్ఫ్ దేశాల్లో ఉపాధి పొందుతున్నారు. తాజా గణాంకాల ప్రకారం సుమారు 22 లక్షల కేరళ వాసులు గల్ఫ్ ప్రాంతంలో నివసిస్తున్నారు. ఎన్నికల సమయంలో వీరిలో చాలా మంది ఓటు హక్కును వినియోగించుకునేందుకు స్వరాష్ట్రానికి తిరిగి వస్తుంటారు. అయితే ఈసారి ఇరాన్-ఇజ్రాయెల్-అమెరికా మధ్య ఉద్రిక్తతల కారణంగా విమాన సౌకర్యాలు పరిమితమవడంతో వారి రాక తగ్గే అవకాశముంది. సాధారణంగా ఏర్పాటు చేసే చార్టర్డ్ విమానాలు ఈసారి అందుబాటులో లేకపోవడంతో వేల సంఖ్యలో ఓటర్లు తిరిగి రాలేకపోతున్నారు.

దీంతో ముఖ్యంగా మలప్పురం, కొళికోడ్, కాసర్‌గోడ్, పాలక్కాడ్, త్రిశ్శూర్ ప్రాంతాల్లో పోలింగ్ శాతంపై ప్రభావం పడే అవకాశముంది. ఈ ప్రాంతాల్లో గల్ఫ్ ఓటర్ల ప్రభావం ఎక్కువగా ఉండటం గమనార్హం.ఇండియన్ యూనియన్ ముస్లిం లీగ్ (IUML) వంటి పార్టీలకు ఈ ఓటర్లు కీలకంగా ఉండటంతో వారి రాక తగ్గితే ఫలితాలపై కొంత ప్రభావం చూపొచ్చని రాజకీయ వర్గాలు అంచనా వేస్తున్నాయి. అయితే మొత్తం రాష్ట్ర స్థాయిలో పెద్ద మార్పు ఉండకపోయినా, కొన్ని నియోజకవర్గాల్లో గెలుపోటములను ప్రభావితం చేసే అవకాశం ఉందని విశ్లేషకులు చెబుతున్నారు. పోలింగ్ శాతం తగ్గే అవకాశంపై రాజకీయ పార్టీలు కూడా ఆందోళన వ్యక్తం చేస్తున్నాయి.