ఇరాన్ యుద్ధంపై సభ్య దేశాల విభిన్న వైఖరి

పశ్చిమాసియాలో ఇరాన్‌పై పెరుగుతున్న ఉద్రిక్తతల నేపథ్యంలో నాటో దేశాల్లో ఏకాభిప్రాయం లేకపోవడం అమెరికాకు పెద్ద సవాల్‌గా మారింది. గతంలో జరిగిన అమెరికా సైనిక చర్యలకు పూర్తి స్థాయిలో సహకరించిన నాటో దేశాలు ఈసారి మాత్రం భిన్నంగా వ్యవహరిస్తున్నాయి.

కొన్ని యూరోపియన్ దేశాలు అమెరికా చర్యలను బహిరంగంగానే వ్యతిరేకించడంతో ట్రంప్ యంత్రాంగం అసహనానికి గురైనట్లు సమాచారం. ఈ నేపథ్యంలో అమెరికా తనకు అనుకూలంగా ఉన్న దేశాలు, వ్యతిరేకంగా వ్యవహరిస్తున్న దేశాలను గుర్తిస్తూ రెండు వేర్వేరు జాబితాలను సిద్ధం చేసినట్లు తెలుస్తోంది.

పోలండ్, రుమేనియా, బాల్టిక్ దేశాలు అమెరికాకు సైనికంగా, లాజిస్టిక్‌గా పూర్తి మద్దతు ఇస్తుండగా, స్పెయిన్, బ్రిటన్ వంటి దేశాలు యుద్ధానికి దూరంగా ఉంటూ తటస్థ వైఖరిని అనుసరిస్తున్నాయి. కొన్ని దేశాలు అయితే అమెరికా విధానాలను తీవ్రంగా విమర్శిస్తున్నాయి.

ఈ పరిణామాలపై స్పందించిన ట్రంప్, సహకరించని దేశాలపై చర్యలు తీసుకోవాల్సిన అవసరం ఉందని సంకేతాలు ఇచ్చారు. ఇందులో సైనిక మద్దతు తగ్గించడం, ఆయుధ సరఫరాలను నిలిపివేయడం వంటి ఆప్షన్లు పరిశీలనలో ఉన్నట్లు తెలుస్తోంది. నాటోలో నెలకొన్న ఈ విభేదాలు పశ్చిమాసియా సంక్షోభాన్ని మరింత క్లిష్టతరం చేసే అవకాశం ఉందని అంతర్జాతీయ విశ్లేషకులు అభిప్రాయపడుతున్నారు.