పశ్చిమాసియా యుద్ధానికి ముగింపు?.. ఇరాన్‌ మూడు అంచెల ప్రణాళిక

పశ్చిమాసియాలో కొనసాగుతున్న యుద్ధానికి ముగింపు దిశగా దౌత్య ప్రయత్నాలు వేగం పుంజుకున్నాయి. ఈ నేపథ్యంలో ఇరాన్‌ అమెరికాకు కొత్తగా మూడు అంచెల ప్రణాళికను సమర్పించింది. ఈ ప్రణాళిక సక్రమంగా అమలైతే 30 రోజుల్లో యుద్ధం ముగిసే అవకాశం ఉందని విశ్లేషకులు భావిస్తున్నారు.

మొదటి అంచెలో హర్మూజ్‌ జలసంధిని క్రమంగా తెరవడం, ఇరాన్‌పై విధించిన ఓడరేవుల దిగ్బంధనాన్ని ఎత్తివేయడం వంటి అంశాలు ఉన్నాయి. అలాగే సముద్రంలో ఉన్న మందుపాతరలను తొలగించే ప్రక్రియను ఇరాన్‌ నేతృత్వంలో చేపట్టనున్నారు.రెండో అంచెలో యురేనియం శుద్ధిని పరిమిత స్థాయిలో తిరిగి ప్రారంభించేందుకు ఇరాన్‌కు అనుమతి ఉంటుంది. అదే సమయంలో అమెరికా, ఇజ్రాయెల్‌ దాడులు చేయకూడదనే నిబంధనతో పాటు, ఇరాన్‌ కూడా దాడులకు దిగకూడదని పేర్కొన్నారు. జప్తు చేసిన ఆస్తులను విడుదల చేయాలని కూడా ప్రణాళికలో ఉంది.

మూడో అంచెలో ప్రాంతీయ భద్రతపై దృష్టి సారిస్తూ, పొరుగున ఉన్న అరబ్ దేశాలతో వ్యూహాత్మక చర్చలు జరపాలని ప్రతిపాదించారు. భవిష్యత్తులో మళ్లీ యుద్ధాలు జరగకుండా ప్రత్యేక భద్రతా వ్యవస్థను ఏర్పాటు చేయాలని సూచించారు.ఇదిలా ఉండగా, హర్మూజ్‌ సమీపంలో ఓ భారీ ట్యాంకర్‌పై చిన్న పడవలతో దాడి జరగడం ఉద్రిక్తతను మరింత పెంచింది. అయితే సిబ్బంది సురక్షితంగా ఉన్నారని అధికారులు తెలిపారు.

ఇరాన్‌ తమ నియంత్రణ హర్మూజ్‌పై కొనసాగుతుందని స్పష్టం చేస్తూ, ఇతర దేశాల నౌకలు టోల్‌ చెల్లించి ప్రయాణించవచ్చని పేర్కొంది. మరోవైపు, ఇరాన్‌ ప్రతిపాదనపై అమెరికా అధ్యక్షుడు డొనాల్డ్ ట్రంప్‌ అసంతృప్తి వ్యక్తం చేశారు. ఇరాన్‌ అడుగుతున్న కొన్ని షరతులు అంగీకరించలేనివని తెలిపారు.అయితే పెద్ద స్థాయి యుద్ధానికి దారితీయకుండా పరిష్కారం కనుగొనే దిశగా చర్చలు కొనసాగుతున్నాయి. మొత్తం మీద ఈ ప్రణాళిక అమలవుతుందా లేదా అన్నది రాబోయే రోజుల్లో స్పష్టత వచ్చే అవకాశం ఉంది.