చూయింగ్ గమ్ వల్ల దవడ నొప్పులు, మైగ్రేన్ ముప్పు: వైద్యుల సూచనలు

ఈ రోజుల్లో పర్‌ఫెక్ట్ ఫేస్ కట్, పదునైన దవడ ఆకృతి పొందడం పెద్ద ట్రెండ్‌గా మారింది. దీనికోసం గంటల తరబడి చూయింగ్ గమ్ నమలడం ఒక ముఖ వ్యాయామంలా సోషల్ మీడియాలో విపరీతంగా ప్రచారం అవుతోంది. ఇలా చేస్తే దవడ ఎముకలు బలపడతాయని, మోడల్స్ లాంటి లుక్ వస్తుందని చాలామంది నమ్ముతున్నారు. కానీ ఈ వాదనల్లో నిజమెంత? నిరంతరం చూయింగ్ గమ్ నమలడం వల్ల ఎలాంటి ఆరోగ్య సమస్యలు వస్తాయో ఇప్పుడు తెలుసుకుందాం.

నిరంతరం చూయింగ్ గమ్ నమలడం వల్ల దవడ కీళ్లపై (టెంపోరోమాండిబ్యులర్ జాయింట్) తీవ్రమైన ఒత్తిడి పడుతుంది. దీంతో దవడ నొప్పి, నోరు తెరవడం–మూయడంలో ఇబ్బంది, నమిలేటప్పుడు క్లిక్ శబ్దాలు రావడం వంటి సమస్యలు ఏర్పడే అవకాశం ఉంటుంది. ఇప్పటికే దవడ సమస్యలు లేదా రాత్రివేళ పళ్లు కొరికే అలవాటు ఉన్నవారికి ఇది మరింత హానికరం. అదనంగా దవడ కండరాలపై అధిక ఒత్తిడి కారణంగా టెన్షన్ తలనొప్పులు, మైగ్రేన్ వచ్చే ప్రమాదం కూడా పెరుగుతుంది.

ఖాళీ కడుపుతో ఎక్కువసేపు చూయింగ్ గమ్ నమలడం కూడా సమస్యలను కలిగిస్తుంది. జీర్ణక్రియ ప్రారంభమవుతుందనే సంకేతంతో కడుపులో ఆమ్లాలు అధికంగా విడుదలవుతాయి. దీంతో ఎసిడిటీ, గ్యాస్, కడుపు ఉబ్బరం, గుండెల్లో మంట వంటి ఇబ్బందులు వచ్చే అవకాశం ఉంటుంది. అంతేకాకుండా గమ్ నమలేటప్పుడు తెలియకుండానే గాలిని మింగడం వల్ల పొట్ట ఉబ్బరం పెరుగుతుంది.

చక్కెర ఉన్న గమ్ మాత్రమే కాకుండా షుగర్-ఫ్రీ గమ్ కూడా పూర్తిగా సురక్షితం కాదు. వాటిలో ఉండే కృత్రిమ స్వీట్నర్లు ఎక్కువ మోతాదులో తీసుకుంటే జీర్ణ సమస్యలు, కడుపునొప్పి లేదా విరేచనాలు రావచ్చు. దీర్ఘకాలంలో ఇవి దంతాల ఎనామెల్‌ను బలహీనపరచే అవకాశం కూడా ఉంది.

వైద్య నిపుణుల సూచన ప్రకారం, ముఖ ఆకృతిని ఆరోగ్యకరంగా మెరుగుపరుచుకోవడానికి చూయింగ్ గమ్ నమలడం సరైన మార్గం కాదు. సమతుల్య ఆహారం, శరీర కొవ్వు తగ్గించడం, తగినంత నీరు తాగడం, అలాగే నిపుణులు సూచించిన సురక్షితమైన ముఖ వ్యాయామాలు చేయడం ద్వారా మాత్రమే సహజమైన, ఆరోగ్యకరమైన ఫేస్ కట్ పొందవచ్చు.