అమెజాన్ మ్యూజిక్ అన్‌లిమిటెడ్ ప్లాన్ ప్రారంభం.. యాడ్‌ఫ్రీ కోసం చెల్లించాల్సిందే

ప్రైమ్ యూజర్లకు అమెజాన్ షాక్ ఇచ్చింది. ఇప్పటివరకు ఉచితంగా అందిస్తున్న అమెజాన్ మ్యూజిక్ సేవల్లో ఇకపై ప్రకటనలు (యాడ్స్) కనిపించనున్నాయి. యాడ్-ఫ్రీ మ్యూజిక్, ఆఫ్‌లైన్ డౌన్‌లోడ్‌లు, ప్రీమియం ఆడియో క్వాలిటీ వంటి అదనపు ఫీచర్లు కావాలనుకునే వినియోగదారులు తప్పనిసరిగా చెల్లింపు సబ్‌స్క్రిప్షన్ తీసుకోవాల్సి ఉంటుంది. ఈ నేపథ్యంలో ‘అమెజాన్ మ్యూజిక్ అన్‌లిమిటెడ్’ అనే కొత్త ప్లాన్‌ను కంపెనీ ప్రవేశపెట్టింది.

అమెజాన్ మ్యూజిక్ సేవలను మూడు విభాగాలుగా విభజించింది. వాటిలో అమెజాన్ మ్యూజిక్ అన్‌లిమిటెడ్ అనేది పెయిడ్ ప్లాన్‌గా ఉండి, ఇందులో ప్రీమియం ఆడియో అనుభవం లభిస్తుంది. 100 మిలియన్లకు పైగా పాటలు, పాడ్‌కాస్ట్‌లు, హెచ్‌డీ, అల్ట్రా హెచ్‌డీ, స్పేషియల్ ఆడియో, డాల్బీ అట్మాస్ వంటి ఆధునిక ఆడియో ఫీచర్లు ఇందులో అందుబాటులో ఉంటాయి. ఈ ప్లాన్‌ను ప్రైమ్ యూజర్లకు నెలకు రూ.99కు, నాన్-ప్రైమ్ యూజర్లకు రూ.119కు అందిస్తోంది. ప్రస్తుతం ప్రైమ్ సభ్యులకు ఆరు నెలల పాటు ఉచితంగా ఈ సేవను అందిస్తున్నారు.

ఇక ప్రైమ్ సబ్‌స్క్రిప్షన్‌లో భాగంగా అందే ప్రాథమిక అమెజాన్ మ్యూజిక్ సేవ కొనసాగుతుంది. అయితే ఇందులో ప్రకటనలు ఉంటాయి. అంతేకాకుండా ఆఫ్‌లైన్ డౌన్‌లోడ్ ఫీచర్‌ను నిలిపివేశారు. త్వరలో ‘అమెజాన్ మ్యూజిక్ ఫ్రీ’ పేరుతో కొత్త ఉచిత ప్లాన్‌ను భారత్‌లో అందుబాటులోకి తీసుకురానున్నారు. అయితే ఇందులో ఫీచర్లు పరిమితంగా ఉండడంతో పాటు మధ్యమధ్యలో యాడ్స్ రావడం ఖాయం.

ఇప్పటికే పలు మ్యూజిక్ స్ట్రీమింగ్ ప్లాట్‌ఫామ్‌లు ఫ్రీ, యాడ్-సపోర్టెడ్, ప్రీమియం సబ్‌స్క్రిప్షన్ మోడళ్లను అమలు చేస్తున్నాయి. అమెజాన్ కూడా అదే విధానాన్ని అనుసరిస్తూ తన మ్యూజిక్ సేవల్లో మార్పులు తీసుకొచ్చింది.