వెలిగొండతో కరవు నేలకు కృష్ణా జలాలు.. రైతుల జీవితాల్లో కొత్త వెలుగులు

ఉమ్మడి ప్రకాశం జిల్లా ప్రజలు, రైతులు మూడు దశాబ్దాలుగా ఎదురుచూస్తున్న వెలిగొండ ప్రాజెక్టు కల సాకారమైందని మంత్రులు అచ్చెన్నాయుడు, గొట్టిపాటి రవికుమార్, డోలా శ్రీ బాల వీరాంజనేయస్వామి, మండిపల్లి రాంప్రసాద్ రెడ్డి తెలిపారు. కృష్ణా వరద జలాలను కరువు ప్రాంతాలకు మళ్లించే ఈ ప్రాజెక్టు పూర్తితో ప్రకాశం, నెల్లూరు, కడప, బాపట్ల తదితర ప్రాంతాల రైతులు, ప్రజలకు ఎంతో ప్రయోజనం చేకూరుతుందని పేర్కొన్నారు.

వెలిగొండ ద్వారా సుమారు 4.47 లక్షల ఎకరాలకు సాగునీరు అందనుంది. దీంతో కరువు ప్రాంతాల్లో వ్యవసాయానికి స్థిరత్వం వస్తుందని మంత్రులు తెలిపారు. ప్రాజెక్టు నీటితో చెరువులు నిండటంతోపాటు భూగర్భ జలాలు కూడా పెరిగే అవకాశం ఉందన్నారు. సాగునీటి లభ్యత పెరగడంతో రైతులు పంటల సాగును విస్తరించుకునే అవకాశం ఏర్పడుతుందని చెప్పారు.

ఫ్లోరైడ్‌ ప్రభావిత ప్రాంతాల్లో నివసించే లక్షలాది మందికి వెలిగొండ ప్రాజెక్టు ద్వారా తాగునీటి భద్రత లభిస్తుందని మంత్రులు వివరించారు. తాగునీటి సమస్యకు పరిష్కారం లభించడంతో ప్రజల జీవన ప్రమాణాలు మెరుగుపడతాయని పేర్కొన్నారు.

సాగునీటి కొరత కారణంగా ప్రతి ఏటా ఉపాధి కోసం ఇతర ప్రాంతాలకు వలస వెళ్లే పరిస్థితులు ఈ ప్రాజెక్టుతో మారతాయని మంత్రులు అన్నారు. స్థానికంగా వ్యవసాయం, అనుబంధ రంగాలు అభివృద్ధి చెందడంతో ఉపాధి అవకాశాలు పెరుగుతాయని తెలిపారు. దీంతో కరువు ప్రాంతాల నుంచి జరిగే వలసలకు శాశ్వత పరిష్కారం లభించే అవకాశం ఉందన్నారు.

వెలిగొండ ప్రాజెక్టు నిర్మాణంలో అనేక సాంకేతిక, భౌగోళిక సవాళ్లను అధిగమించామని మంత్రి గొట్టిపాటి రవికుమార్ తెలిపారు. కొండలను తొలచడం, సొరంగాల నిర్మాణం, ఫీడర్ కాలువల ఏర్పాటు, భూసేకరణ, పునరావాసం వంటి క్లిష్టమైన పనులను పూర్తి చేశామని వివరించారు. ప్రాజెక్టు పూర్తితో ఈ ప్రాంతంలో వ్యవసాయంతోపాటు ఆర్థిక కార్యకలాపాలు ఊపందుకుంటాయని చెప్పారు.

వెలిగొండ ప్రాజెక్టు కారణంగా నిర్వాసితులైన కుటుంబాల సమస్యల పరిష్కారానికి కూటమి ప్రభుత్వం ప్రత్యేక ప్రాధాన్యం ఇచ్చిందని మంత్రి మండిపల్లి రాంప్రసాద్ రెడ్డి తెలిపారు. కేవలం 48 రోజుల్లోనే రూ.762 కోట్ల పరిహారం అందించినట్లు చెప్పారు. మిగిలిన సమస్యలను కూడా పరిష్కరించేందుకు ప్రభుత్వం చర్యలు తీసుకుంటుందని పేర్కొన్నారు.

1996లో ప్రాజెక్టుకు శంకుస్థాపన చేసిన చంద్రబాబు చేతుల మీదుగానే వెలిగొండ ప్రాజెక్టు జాతికి అంకితం కావడం చారిత్రాత్మక ఘట్టమని మంత్రి అచ్చెన్నాయుడు అన్నారు. కృష్ణా జలాలను కరువు నేలకు తీసుకురావాలన్న లక్ష్యం ఇప్పుడు సాకారమైందని చెప్పారు.

కరువు నేలకు కృష్ణా జలాలను తీసుకొచ్చిన ముఖ్యమంత్రి చంద్రబాబు నాయుడిని మంత్రి డోలా శ్రీ బాల వీరాంజనేయస్వామి ‘అపర భగీరథుడు’గా అభివర్ణించారు. వెలిగొండ ప్రాజెక్టు నాలుగు జిల్లాల రైతులు, ప్రజల భవిష్యత్తును మార్చే కీలక ప్రాజెక్టుగా నిలుస్తుందని అన్నారు.

వెలిగొండ పూర్తితో సాగునీరు, తాగునీరు, వ్యవసాయం, ఉపాధి, ప్రాంతీయ ఆర్థికాభివృద్ధి రంగాల్లో గణనీయమైన మార్పులు వస్తాయని మంత్రులు పేర్కొన్నారు. కరువు ప్రాంతాలకు జీవధారగా నిలిచే ఈ ప్రాజెక్టు కొత్త అభివృద్ధి అధ్యాయానికి నాంది పలుకుతుందని తెలిపారు.