ముంబయి-గోవా హైవే పనులపై గడ్కరీ తీవ్ర ఆగ్రహం

ముంబయి-గోవా జాతీయ రహదారి విస్తరణ పనులు ఏళ్ల తరబడి కొనసాగుతుండటంపై కేంద్ర రహదారులు, రవాణా శాఖ మంత్రి నితిన్‌ గడ్కరీ తీవ్ర అసంతృప్తి వ్యక్తం చేశారు. ఈ ప్రాజెక్టు పనులు ఇంత ఆలస్యం కావడం సిగ్గుగా ఉందని వ్యాఖ్యానించారు. రహదారి పనులు పూర్తయ్యే వరకు ప్రారంభోత్సవ కార్యక్రమానికి తాను హాజరుకాబోనని స్పష్టం చేశారు. గోవాలోని పోర్వోరిమ్‌లో ఆరు వరుసల ఎలివేటెడ్‌ కారిడార్‌ను ప్రారంభించిన సందర్భంగా ఆయన ఈ వ్యాఖ్యలు చేశారు.

ముంబయి-గోవా హైవే నిర్మాణంలో పలువురు కాంట్రాక్టర్లు తమ బాధ్యతలను సక్రమంగా నిర్వర్తించడంలో విఫలమయ్యారని గడ్కరీ పేర్కొన్నారు. పనుల్లో నిర్లక్ష్యం వహించే కాంట్రాక్టర్లపై కఠిన చర్యలు తీసుకుంటామని హెచ్చరించారు. అవసరమైతే పెద్ద సంఖ్యలో కాంట్రాక్టర్లను బ్లాక్‌లిస్ట్‌లో పెడతామని, బాధ్యతారహితంగా వ్యవహరించిన అధికారులను సస్పెండ్‌ చేసి రికార్డు సృష్టించాలనుకుంటున్నానని అన్నారు.

ఈ ప్రాజెక్టు కోసం ఇంతకాలం ఎదురుచూసినా ఆశించిన స్థాయిలో పనులు పూర్తికాకపోవడం పట్ల ఆయన ఆవేదన వ్యక్తం చేశారు. మిగిలిన పనులను వేగంగా పూర్తి చేసేందుకు సంబంధిత అధికారులు, కాంట్రాక్టర్లు రెట్టింపు వేగంతో పనిచేయాలని సూచించారు. భూసేకరణ, పర్యావరణ అనుమతుల్లో జాప్యం, కాంట్రాక్టర్ల పనితీరు వంటి పలు కారణాలతో ప్రాజెక్టు గడువులు పలుమార్లు పొడిగించాల్సి వచ్చిందని తెలిపారు.

ముంబయి-గోవా హైవే విస్తరణ పనులు వాస్తవానికి 2016లోనే పూర్తికావాల్సి ఉంది. అయితే వివిధ కారణాలతో పనులు ఆలస్యమయ్యాయి. ప్రస్తుతం ప్రాజెక్టు పనులు 93-94 శాతం వరకు పూర్తయ్యాయని గడ్కరీ వెల్లడించారు. మిగిలిన పనులను కూడా త్వరితగతిన పూర్తి చేయాలని అధికారులను ఆదేశించారు. వచ్చే అక్టోబరులో తాను స్వయంగా ప్రాజెక్టు పనులను పరిశీలిస్తానని తెలిపారు.

అదే సమయంలో రహదారి నిర్మాణంలో వేగంతో పాటు నాణ్యతకు కూడా అత్యంత ప్రాధాన్యం ఇవ్వాలని గడ్కరీ స్పష్టం చేశారు. పనుల నాణ్యత విషయంలో ఎలాంటి రాజీ ఉండకూడదని అధికారులకు ఆదేశించారు. ప్రజలకు సురక్షితమైన, నాణ్యమైన రహదారి అందించడమే లక్ష్యంగా పనిచేయాలని సూచించారు.