‘కాంతార’ తరహా రహస్య అడవి

హిమాచల్ ప్రదేశ్‌లోని కుల్లూ జిల్లా సైంజ్ లోయలో ఉన్న బంజార్ ప్రాంతంలో ‘రింగు వన్’ అనే ప్రత్యేక అడవి స్థానిక సంస్కృతి, విశ్వాసాలకు ప్రతీకగా నిలుస్తోంది. ఈ అడవిని స్థానికులు నాగదేవత Ringunag Devta కాపాడుతున్నట్లు నమ్ముతారు.

దాదాపు 62 ఎకరాల్లో విస్తరించిన ఈ అడవిలోకి ప్రవేశించడం, చెట్లు నరకడం, అగ్ని రగిలించడం పూర్తిగా నిషిద్ధం. స్థానిక గ్రామ మండళ్ల అనుమతి లేకుండా అటవీశాఖ అధికారులు కూడా అడుగు పెట్టలేరని సమాచారం. అడవి బయటే హెచ్చరిక బోర్డులు ఏర్పాటు చేశారు.

చుట్టుపక్కల ప్రాంతాల్లో అటవీ నష్టం జరిగినా, రింగు వన్ మాత్రం ఇప్పటికీ సాంద్రమైన పచ్చదనంతో కళకళలాడుతోంది. ఈ ప్రత్యేకతను గతంలో యునెస్కో బృందం కూడా గుర్తించినట్లు స్థానికులు చెబుతున్నారు.

కుల్లూ దసరా ఉత్సవాల్లో రింగు నాగ్ దేవత రథయాత్ర ప్రత్యేక ఆకర్షణగా నిలుస్తుంది. ఈ దేవత పాము, సింహం, పొట్టేలు వంటి మూడు రూపాల్లో దర్శనమిస్తుందని నమ్మకం ఉంది.

స్థానికుల ప్రకారం, నాగ పంచమి, సజ వైశాఖ వంటి ప్రత్యేక సందర్భాల్లో మాత్రమే పూజారులు ఉపవాస దీక్షతో ఈ అడవిలోకి ప్రవేశిస్తారు. ఈ సంప్రదాయం తరతరాలుగా కొనసాగుతూ ప్రకృతి పరిరక్షణకు ఆధ్యాత్మిక బలాన్ని ఇస్తోంది.