క్రికెటర్లకు అత్యుత్తమ శిక్షణ, సౌకర్యాలు.. సీవోఈపై బీసీసీఐ దృష్టి

దాదాపు 40 ఎకరాల బీడు భూమిని అత్యాధునిక క్రికెట్‌ శిక్షణ కేంద్రంగా తీర్చిదిద్దిన బీసీసీఐ సెంటర్‌ ఆఫ్‌ ఎక్స్‌లెన్స్‌ (CoE) ప్రస్తుతం మరోసారి వార్తల్లో నిలిచింది. ఆటగాళ్ల గాయాలు, వారికి అందుతున్న వైద్య సదుపాయాలపై ఇటీవల చర్చ జరుగుతున్న నేపథ్యంలో బీసీసీఐ అధ్యక్షుడు మిథున్‌ మన్హాస్‌, కార్యదర్శి దేవజిత్‌ సైకియా, ఇతర బోర్డు అధికారులు సీవోఈని సందర్శించారు. సీవోఈ హెడ్‌ వీవీఎస్‌ లక్ష్మణ్‌తో ప్రత్యేకంగా సమావేశమై ఆటగాళ్లకు అందుతున్న సౌకర్యాలు, శిక్షణ, వైద్య మౌలిక వసతులపై చర్చించారు.

ఈ సందర్భంగా సీవోఈ ప్రస్తుత స్థాయికి చేరుకోవడం వెనుక ఐసీసీ ఛైర్మన్‌, బీసీసీఐ మాజీ కార్యదర్శి జై షా కృషి కీలకమని దేవజిత్‌ సైకియా, వీవీఎస్‌ లక్ష్మణ్‌ గుర్తుచేశారు. పాత జాతీయ క్రికెట్‌ అకాడమీ స్థానంలో అత్యాధునిక సదుపాయాలతో కొత్త కేంద్రాన్ని నిర్మించాలన్న ఆలోచనను కార్యరూపంలోకి తీసుకురావడంలో జై షా ముఖ్యపాత్ర పోషించారని తెలిపారు.

భూమి నుంచి సీవోఈ వరకు :

సుమారు 40 ఎకరాల నిరుపయోగ భూమిని అభివృద్ధి చేయడం అంత సులభంగా జరగలేదని బీసీసీఐ అధికారులు వెల్లడించారు. భూమికి సంబంధించిన ప్రక్రియలో పలు సవాళ్లు, చట్టపరమైన అడ్డంకులు ఎదురయ్యాయని తెలిపారు. ప్రాజెక్టు పనులు ఆలస్యం కాకుండా జై షా పలుమార్లు స్వయంగా అక్కడికి వచ్చి సంబంధిత వర్గాలతో చర్చించి సమస్యలను పరిష్కరించేందుకు కృషి చేశారని సైకియా పేర్కొన్నారు.

అందరినీ సమన్వయం చేసి భూమికి సంబంధించిన సమస్యలను పరిష్కరించడంతో నిర్మాణ పనులు వేగంగా ముందుకు సాగాయని తెలిపారు. ఆర్కిటెక్ట్‌లు, నిర్మాణ సంస్థలు, బీసీసీఐ అధికారులతో నిరంతరం సమన్వయం చేస్తూ ప్రాజెక్టును ముందుకు తీసుకెళ్లినట్లు లక్ష్మణ్‌ చెప్పారు.

రెండేళ్లలోనే నిర్మాణం పూర్తి :

2022 ఫిబ్రవరి 14న సీవోఈ నిర్మాణ పనులు ప్రారంభమయ్యాయి. దాదాపు రెండేళ్ల వ్యవధిలోనే అత్యాధునిక మౌలిక వసతులతో కేంద్రాన్ని సిద్ధం చేశారు. 2024 నవంబర్‌లో సీవోఈ కార్యకలాపాలు ప్రారంభమయ్యాయి.

క్రికెటర్ల శిక్షణతో పాటు వారి ఫిట్‌నెస్‌, గాయాల నుంచి కోలుకునే ప్రక్రియ, అత్యాధునిక సాంకేతికత, క్రీడా విజ్ఞానం వంటి అంశాలకు ప్రాధాన్యం ఇచ్చేలా కేంద్రాన్ని తీర్చిదిద్దారు. దేశంలోని అత్యుత్తమ క్రికెట్‌ ప్రతిభకు అంతర్జాతీయ స్థాయి శిక్షణ, మౌలిక వసతులు అందించడమే దీని ప్రధాన లక్ష్యంగా నిలిచింది.