దేశంలో కఫ్ సిరప్ విక్రయాలపై కేంద్రం కీలక నిర్ణయం

దేశంలో నకిలీ మరియు ప్రమాదకరమైన మందుల విక్రయాలను అరికట్టేందుకు కేంద్ర ఆరోగ్య, కుటుంబ సంక్షేమ మంత్రిత్వ శాఖ కీలక నిర్ణయం తీసుకుంది. ముఖ్యంగా గ్రామీణ ప్రాంతాల్లో కఫ్ సిరప్‌ల (దగ్గు మందులు) విక్రయాలపై ఇప్పటివరకు ఉన్న మినహాయింపులను పూర్తిగా రద్దు చేసింది. ఇకపై చిన్న పల్లెటూరైనా సరే సరైన డ్రగ్ లైసెన్స్ లేకుండా కఫ్ సిరప్‌లను విక్రయించడానికి వీల్లేదని స్పష్టం చేసింది.

ప్రజారోగ్య భద్రతను దృష్టిలో ఉంచుకుని కేంద్ర ప్రభుత్వం డ్రగ్స్ రూల్స్, 1945లో కీలక సవరణలు చేసింది. దీనికి సంబంధించిన అధికారిక గెజిట్ నోటిఫికేషన్ కూడా జారీ అయింది. గత నిబంధనల ప్రకారం 1,000 కంటే తక్కువ జనాభా ఉన్న గ్రామాల్లో రిటైల్ లైసెన్స్ లేకపోయినా కొన్ని షరతులతో కఫ్ సిరప్‌ల విక్రయం అనుమతించబడేది. అయితే తాజా సవరణతో ఆ మినహాయింపును పూర్తిగా రద్దు చేశారు.

కొత్త నిబంధనల ప్రకారం ఇకపై కఫ్ సిరప్‌ల విక్రయం, పంపిణీ కేవలం లైసెన్స్ పొందిన ఫార్మసీల (మెడికల్ షాపులు) ద్వారానే జరగాలి. డ్రగ్స్ అండ్ కాస్మెటిక్స్ యాక్ట్, 1940 నిబంధనలను ఖచ్చితంగా పాటించాల్సి ఉంటుంది. దీని ద్వారా నకిలీ మందుల సరఫరాను అడ్డుకోవడంతో పాటు విక్రయాల్లో పూర్తి పారదర్శకతను తీసుకురావడం లక్ష్యంగా పెట్టుకున్నారు.

దగ్గు మందుల విక్రయాలను మరింత బాధ్యతాయుతంగా నిర్వహించేందుకు ఈ చర్యలు ఉపయోగపడతాయని ఆరోగ్య శాఖ పేర్కొంది. ఎక్కడైనా నిబంధనలు ఉల్లంఘించినా లేదా రికార్డుల్లో పారదర్శకత లోపించినా సంబంధిత డ్రగ్ లైసెన్సులను తక్షణమే రద్దు చేస్తామని కేంద్రం హెచ్చరించింది. దేశవ్యాప్తంగా తయారీదారులు, హోల్‌సేల్ పంపిణీదారులు, రిటైల్ వ్యాపారులు ఈ కొత్త నిబంధనలకు లోబడి పనిచేయాలని స్పష్టం చేసింది.

ఈ నిర్ణయం ద్వారా చిన్న గ్రామాల్లో కూడా నాణ్యమైన వైద్య ప్రమాణాలు అందుబాటులోకి వచ్చి, నకిలీ మందుల ముప్పు తగ్గుతుందని నిపుణులు అభిప్రాయపడుతున్నారు.