అప్పుల బాధతో కుటుంబం ఆత్మహత్యాయత్నం.. గోదావరిలోకి దూకిన నలుగురు

అప్పుల బాధ తాళలేక ఓ కుటుంబం గోదావరి నదిలోకి దూకి ఆత్మహత్యకు యత్నించిన విషాద ఘటన పశ్చిమగోదావరి జిల్లా యలమంచిలి మండలం చించినాడ బ్రిడ్జి వద్ద చోటుచేసుకుంది. తణుకుకు చెందిన నంబూరు శ్రీనివాస్, పద్మిని దంపతులు స్థానికంగా కిరాణా దుకాణం, పాల వ్యాపారం నిర్వహిస్తూ జీవనం సాగిస్తున్నారు. అయితే వ్యాపారం ఆశించిన స్థాయిలో సాగకపోవడంతో పాటు అప్పుల భారం పెరగడంతో తీవ్ర ఒత్తిడికి గురైనట్లు తెలుస్తోంది.

ఈ క్రమంలో శనివారం తెల్లవారుజామున దంపతులు తమ 16 ఏళ్ల కుమారుడు, 12 ఏళ్ల కుమార్తెతో కలిసి చించినాడ బ్రిడ్జి వద్దకు చేరుకున్నారు. అనంతరం నలుగురూ బ్రిడ్జిపై నుంచి గోదావరి నదిలోకి దూకినట్లు సమాచారం. ఈ ఘటనను గమనించిన జాలర్లు వెంటనే స్పందించి పద్మినిని రక్షించారు. అప్పటికే ఆమె అపస్మారక స్థితిలోకి వెళ్లడంతో ఏలూరు ప్రభుత్వాసుపత్రికి తరలించి చికిత్స అందిస్తున్నారు.

అయితే శ్రీనివాస్‌తో పాటు ఆయన కుమారుడు, కుమార్తె గల్లంతయ్యారు. సమాచారం అందుకున్న పోలీసులు, రెస్క్యూ సిబ్బంది నదిలో గాలింపు చర్యలు చేపట్టారు. జాలర్ల సహకారంతో గల్లంతైన ముగ్గురి ఆచూకీ కోసం గాలిస్తున్నారు. ఘటనకు సంబంధించి పూర్తి వివరాలు తెలియాల్సి ఉంది.

శ్రీనివాస్‌ స్వస్థలం భీమవరంలోని మత్స్యపురి అని స్థానికులు తెలిపారు. సుమారు 20 ఏళ్ల క్రితం ఆయన తణుకుకు వచ్చి అక్కడే స్థిరపడ్డారని చెప్పారు. ఆయన కుమారుడు పాలిటెక్నిక్‌ మొదటి సంవత్సరం చదువుతుండగా.. కుమార్తె స్థానిక ప్రైవేట్‌ పాఠశాలలో తొమ్మిదో తరగతి చదువుతోంది. పిల్లలతో కలిసి కుటుంబం తీసుకున్న ఈ నిర్ణయం స్థానికులను తీవ్ర విషాదానికి గురిచేసింది.

ఇదిలా ఉండగా.. చించినాడ బ్రిడ్జి పరిసర ప్రాంతంలో ఇటీవల మరో విషాద ఘటన చోటుచేసుకుంది. తణుకు మండలం వేల్పూరుకు చెందిన దంపతులు ఇదే ప్రాంతంలో గోదావరిలోకి దూకిన ఘటనలో భర్త మృతి చెందగా.. భార్య ఆచూకీ ఇప్పటికీ లభించలేదు. ఆ ఘటన జరిగిన పది రోజుల వ్యవధిలోనే మరో కుటుంబం గోదావరిలోకి దూకడంతో స్థానికంగా ఆందోళన వ్యక్తమవుతోంది.