పిఠాపురంలో మహిళలకు పవన్‌ కల్యాణ్‌ శ్రావణ కానుక

శ్రావణ మాసాన్ని పురస్కరించుకుని పిఠాపురం నియోజకవర్గ మహిళలకు ఉప ముఖ్యమంత్రి పవన్‌ కల్యాణ్‌ తరఫున వరుసగా మూడో ఏడాది శ్రావణ కానుక అందింది. ఇందులో భాగంగా 10 వేల చీరలను మహిళలకు పంపించారు. కాకినాడ జిల్లా పిఠాపురంలోని పాదగయ క్షేత్రంలో శుక్రవారం సామూహిక వరలక్ష్మీ వ్రతాలను ఘనంగా నిర్వహించారు.

ఉదయం 5 గంటల నుంచి మధ్యాహ్నం 12.30 గంటల వరకు ఐదు విడతల్లో మహిళలు వరలక్ష్మీ వ్రతాలను భక్తిశ్రద్ధలతో ఆచరించారు. పెద్ద సంఖ్యలో మహిళలు హాజరు కావడంతో పాదగయ క్షేత్రం భక్తులతో కిటకిటలాడింది. వ్రతాల్లో పాల్గొన్న మహిళలకు చీరలతో పాటు పసుపు, కుంకుమ కిట్లను పంపిణీ చేశారు.

కాకినాడ గ్రామీణ ఎమ్మెల్యే నానాజీ, పోలీస్‌ హౌసింగ్‌ కార్పొరేషన్‌ ఛైర్మన్‌ కల్యాణం శివశ్రీనివాసరావు, మాజీ ఎమ్మెల్యే దొరబాబు, డీసీసీబీ ఛైర్మన్‌ తుమ్మల రామస్వామి, జనసేన ఫైవ్‌మెన్‌ కమిటీ సభ్యుడు ఓదూరి కిషోర్‌, కాపు కార్పొరేషన్‌ డైరెక్టర్‌ చల్లా లక్ష్మి తదితరులు మహిళలకు చీరలు, పసుపు, కుంకుమ కిట్లను అందజేశారు.

వ్రతాల సందర్భంగా మహిళలు ప్రత్యేక పూజలు నిర్వహించి అమ్మవారిని దర్శించుకున్నారు. ఉప ముఖ్యమంత్రి పవన్‌ కల్యాణ్‌ పంపించిన చీరలను అందుకున్న మహిళలు ఆనందం వ్యక్తం చేశారు. శ్రావణ మాసంలో వరలక్ష్మీ వ్రతానికి ప్రత్యేక ప్రాధాన్యం ఉండటంతో పెద్ద సంఖ్యలో మహిళలు కార్యక్రమానికి తరలివచ్చారు.

కార్యక్రమానికి ముందు ఆలయంలోని కుక్కుటేశ్వరస్వామి, రాజరాజేశ్వరి అమ్మవారు, పదో శక్తిపీఠంగా ప్రసిద్ధి చెందిన పురుహూతిక అమ్మవారు, దత్తాత్రేయస్వామివారికి జనసేన నాయకులు పట్టువస్త్రాలు సమర్పించారు. అనంతరం సామూహిక వరలక్ష్మీ వ్రత కార్యక్రమాన్ని నిర్వహించారు.

మహిళలకు ఎలాంటి ఇబ్బందులు కలగకుండా నిర్వాహకులు ప్రత్యేక ఏర్పాట్లు చేశారు. పాడా పీడీ డా. శివరామ్‌ ప్రసాద్‌, ఈవో జగన్మోహన్‌ శ్రీనివాస్‌ ఏర్పాట్లను పర్యవేక్షించారు. భక్తులకు అవసరమైన సౌకర్యాలు కల్పించడంతో కార్యక్రమం ప్రశాంతంగా ముగిసింది.