ఎస్‌ఐఆర్ విషయంలో నిర్లక్ష్యాన్ని సహించేది లేదని సీఎం రేవంత్‌రెడ్డి హెచ్చరిక

ఎస్‌ఐఆర్ (ఓటరు జాబితా ప్రత్యేక సవరణ) అంశంపై తెలంగాణ కాంగ్రెస్ నాయకత్వం అప్రమత్తమైంది. ఈ ప్రక్రియలో ఎలాంటి నిర్లక్ష్యానికి తావు ఇవ్వకూడదని సీఎం రేవంత్‌రెడ్డి స్పష్టం చేశారు. నిర్లక్ష్యంగా వ్యవహరించే నాయకులను క్షమించే ప్రసక్తే లేదని హెచ్చరించిన ఆయన, పనిచేయని వారిపై కఠిన చర్యలు తప్పవని తేల్చిచెప్పారు. పని చేయని నాయకులకు 10 రోజుల గడువు ఇచ్చి పనితీరు పరిశీలిస్తామని, తర్వాత అవసరమైతే వారి స్థానంలో కొత్త వారిని నియమిస్తామని పేర్కొన్నారు.

ఎస్‌ఐఆర్‌పై గ్రామ స్థాయిలో విస్తృత ప్రచారం చేయాలని, సర్పంచ్‌లను భాగస్వామ్యం చేయాలని సీఎం సూచించారు. ఓటరు జాబితా సవరణ ప్రక్రియపై ప్రజల్లో అవగాహన కల్పించడం పార్టీ బాధ్యతగా తీసుకోవాలని తెలిపారు. రేపటి నుంచి ప్రారంభమయ్యే ఈ కార్యక్రమం నేపథ్యంలో కాంగ్రెస్ పార్టీ ప్రత్యేకంగా అప్రమత్తమైంది.

ఈ సందర్భంగా నిర్వహించిన జూమ్ సమావేశంలో టీపీసీసీ అధ్యక్షుడు మహేష్ కుమార్ గౌడ్, సీఎం రేవంత్‌రెడ్డి, ఏఐసీసీ ఇన్‌ఛార్జ్ మీనాక్షి నటరాజన్, ఉప ముఖ్యమంత్రి భట్టి విక్రమార్క, ఏఐసీసీ కార్యదర్శి సచిన్ సావంత్‌తో పాటు మంత్రులు, ఎమ్మెల్యేలు, ఎంపీలు, నియోజకవర్గ ఇన్‌ఛార్జులు పాల్గొన్నారు.

పార్టీ శ్రేణులు పూర్తిగా సమన్వయంతో పనిచేయాలని, ఎమ్మెల్యేలు, నియోజకవర్గ ఇన్‌ఛార్జులు, బూత్ స్థాయి నాయకులు అత్యంత అప్రమత్తంగా ఉండాలని మహేష్ కుమార్ గౌడ్ సూచించారు. ఓటర్ల హక్కులను కాపాడడంలో కాంగ్రెస్ కార్యకర్తలు కీలక పాత్ర పోషించాలని పిలుపునిచ్చారు. ఓటరు జాబితా సవరణలో ఎలాంటి పొరపాట్లు జరగకూడదని ఆయన హెచ్చరించారు.

దేశవ్యాప్తంగా భాజపా రాజకీయ వ్యూహాలను గమనించాల్సిన అవసరం ఉందని ఆయన పేర్కొన్నారు. ముఖ్యంగా పశ్చిమ బెంగాల్‌లో ఓట్ల నిర్వహణలో జరిగిన పరిణామాలను ప్రస్తావిస్తూ, అనుకూల ఓట్లను తొలగించే ప్రయత్నాలు జరిగే అవకాశం ఉందని ఆందోళన వ్యక్తం చేశారు. లౌకికవాద ఓట్లను లక్ష్యంగా చేసుకుని కుట్రలు జరగవచ్చని, అర్హులైన ప్రతి ఓటు జాబితాలో ఉండేలా పార్టీ శ్రేణులు జాగ్రత్తలు తీసుకోవాలని సూచించారు.

బూత్ లెవల్ ఏజెంట్లు (BLAs) అత్యంత కీలకంగా పనిచేయాలని నాయకత్వం స్పష్టం చేసింది. ప్రతి బూత్ స్థాయిలో క్షుణ్ణంగా పరిశీలన చేసి, ఓటరు జాబితా ఖచ్చితత్వాన్ని నిర్ధారించాల్సిన అవసరం ఉందని పార్టీ నేతలు పేర్కొన్నారు.