డార్క్‌వెబ్, కొరియర్‌లతో డ్రగ్స్‌ రవాణా.. ఈగల్‌ నివేదికలో సంచలన విషయాలు

మాదకద్రవ్యాల రవాణా కోసం విక్రేతలు రోజురోజుకు కొత్త ఎత్తుగడలు అవలంబిస్తుండటంతో అధికారులే ఆశ్చర్యానికి గురవుతున్నారు. కేవలం రవాణానే కాకుండా, అమ్మకాల ద్వారా సంపాదించిన డబ్బును దేశం బయటకు తరలించే విధానాల్లో కూడా నేరగాళ్లు అత్యంత తెలివైన మార్గాలను ఉపయోగిస్తున్నట్లు ఎలైట్ యాక్షన్ గ్రూప్ ఫర్ డ్రగ్ లా ఎన్‌ఫోర్స్‌మెంట్ (ఈగల్) నివేదిక వెల్లడించింది.

నివేదిక ప్రకారం, డ్రగ్ విక్రేతలు తమ గుర్తింపు బయటపడకుండా డార్క్‌వెబ్‌లో తప్పుడు పేర్లు, చిరునామాలతో ఆర్డర్లు చేస్తున్నారు. అయితే ఫోన్ నంబర్ మాత్రం నిజమైనదే ఉంచుతున్నారు. పార్శిల్ బుక్ అయిన వెంటనే కొనుగోలుదారులకు బుకింగ్ నంబర్ పంపించి, ట్రాక్ చేసుకునేలా చేస్తున్నారు. పార్శిల్ సమీప కొరియర్ కార్యాలయానికి చేరగానే, బుకింగ్ నంబర్ చెప్పి స్వయంగా తీసుకెళ్తున్నారు.

అంతేకాకుండా గంజాయి కలిపిన చాక్లెట్లను కూడా ఈ-కామర్స్ వెబ్‌సైట్ల ద్వారా విక్రయిస్తూ, ఆన్‌లైన్ ఆర్డర్లతో నేరుగా ఇంటికే సరఫరా చేస్తున్నట్లు అధికారులు గుర్తించారు. నగరంలో ఒక ప్రాంతం నుంచి మరో ప్రాంతానికి డ్రగ్స్ తరలించడానికి బైక్, కార్ టాక్సీ అగ్రిగేటర్ సర్వీసులను వినియోగిస్తున్నారని కూడా తేలింది.

అంతర్జాతీయంగా నెదర్లాండ్స్, బెల్జియం, ఫ్రాన్స్ వంటి దేశాల నుంచి కొరియర్ సర్వీసుల ద్వారా మత్తుమందులు వస్తున్నట్లు గుర్తించారు. అయితే పార్శిల్‌లో ఏముందో కొరియర్ సంస్థలు సరైన తనిఖీ చేయకపోవడం సమస్యగా మారిందని అధికారులు పేర్కొన్నారు.

కొకైన్, హెరాయిన్ వంటి డ్రగ్స్ సరఫరాలో ఆఫ్రికా దేశాల వ్యక్తుల పాత్ర ఎక్కువగా ఉన్నట్లు నివేదిక చెబుతోంది. ఒకే వ్యక్తి వేర్వేరు దేశాల పాస్‌పోర్టులు ఉపయోగిస్తూ కార్యకలాపాలు కొనసాగిస్తున్నాడు. దొరికితే ఒక పాస్‌పోర్ట్ బయటపడగా, బయటకు వచ్చాక మరో పాస్‌పోర్ట్‌తో మళ్లీ కార్యకలాపాలు కొనసాగిస్తున్నారని అధికారులు గుర్తించారు.

నైజీరియా నుంచి విద్యార్థి వీసాలపై వచ్చే కొందరు ఇక్కడే ఉన్న తమ దేశస్థులతో కలిసి డ్రగ్స్ వ్యాపారం చేస్తున్నట్లు వెల్లడైంది. మరికొందరు వీసా చించివేసి గుర్తింపు లేకుండా మారిపోతున్నారని, దీంతో వారిని పట్టుకోవడం లేదా డిపోర్ట్ చేయడం కష్టంగా మారిందని అధికారులు తెలిపారు.

డ్రగ్స్ ద్వారా సంపాదించిన డబ్బును హవాలా మార్గంలో ముంబయి, త్రిపురకు తరలిస్తున్నట్లు కూడా బయటపడింది. గతంలో విద్యార్థి వీసాలపై వచ్చి వెళ్లిన వారి బ్యాంకు ఖాతాలను కూడా ఈ నెట్‌వర్క్ వినియోగిస్తున్నట్లు తెలిసింది.

ఇక నైజీరియా నుంచి దుస్తుల వ్యాపారం పేరుతో భారత్‌కు వచ్చేవారికి డ్రగ్ డబ్బు అందించి, వారు వస్తువులు కొనుగోలు చేసి తిరిగి ఎగుమతి చేస్తున్నారని, ఆ తర్వాత అదే డబ్బును విదేశాల్లో వ్యాపారులు చెప్పిన ఖాతాల్లో జమ చేస్తున్నారని నివేదిక పేర్కొంది.

ఈ అన్ని ఎత్తుగడలను గమనించిన ఈగల్ అధికారులు, వీటిని అడ్డుకునేందుకు కొత్త వ్యూహాలు రూపొందించాలని, సంబంధిత ప్రభుత్వ విభాగాలు కఠిన నియమ నిబంధనలు తీసుకురావాలని సూచించారు.