తెలంగాణలో డిజిటల్ హెల్త్ ప్రొఫైల్ ప్రారంభం

తెలంగాణ రాష్ట్రంలో వైద్య సేవలను మరింత వేగవంతంగా, పారదర్శకంగా అందించేందుకు ప్రభుత్వం మరో కీలక నిర్ణయం తీసుకుంది. అత్యాధునిక సాంకేతికత ఆధారంగా డిజిటల్ హెల్త్ ప్రొఫైల్ వ్యవస్థను అమలు చేయాలని నిర్ణయించింది. ఈ ప్రాజెక్టును ప్రారంభ దశలో పైలట్ ప్రాజెక్టుగా సంగారెడ్డి జిల్లాలో అమలు చేయనున్నారు.

ఈ ప్రాజెక్టు అమలుపై రాష్ట్ర వైద్యారోగ్య శాఖ మంత్రి దామోదర రాజనర్సింహ అధికారులతో సమీక్ష సమావేశం నిర్వహించారు. ఈ పైలట్ ప్రాజెక్టు కింద సంగారెడ్డి జిల్లాలోని మొత్తం 64 ప్రభుత్వ ఆసుపత్రులను ఒకే డిజిటల్ వ్యవస్థతో అనుసంధానించనున్నారు. ఇందులో జనరల్ హాస్పిటల్స్, ఏరియా హాస్పిటల్స్, బస్తీ దవాఖానలు, ప్రాథమిక ఆరోగ్య కేంద్రాలు కూడా ఉంటాయి.

ఆసుపత్రికి వచ్చే ప్రతి రోగికి ప్రత్యేకంగా డిజిటల్ హెల్త్ కార్డు జారీ చేయనున్నారు. రోగి ఆసుపత్రిలో అడుగుపెట్టిన క్షణం నుంచి చికిత్స పూర్తయ్యే వరకు జరిగే ప్రతి వైద్య సమాచారం కంప్యూటర్ వ్యవస్థలో నమోదు అవుతుంది. ఈ కార్డులో రోగి పాత వైద్య చరిత్ర, ఓపీ వివరాలు, ల్యాబ్ రిపోర్టులు, వాడిన మందులు వంటి వివరాలు పూర్తిగా డిజిటల్ రూపంలో భద్రపరచబడతాయి.

దీని వల్ల అత్యవసర పరిస్థితుల్లో లేదా రోగి వేరే ఆసుపత్రికి వెళ్లినప్పుడు పాత రికార్డుల కోసం వెతకాల్సిన అవసరం ఉండదు. వైద్యులు వెంటనే రోగి ఆరోగ్య చరిత్రను చూసి సరైన చికిత్స అందించగలుగుతారు. ముఖ్యంగా క్యాన్సర్, గుండె సంబంధిత వ్యాధులను ప్రారంభ దశలోనే గుర్తించి అవసరమైన చికిత్స అందించడానికి ఇది ఎంతో ఉపయోగపడుతుంది.

సంగారెడ్డి జిల్లాలో ఈ ప్రాజెక్టు విజయవంతమైతే, రాష్ట్రవ్యాప్తంగా ఈ వ్యవస్థను అమలు చేయాలని ప్రభుత్వం యోచిస్తోంది. ప్రజారోగ్య రంగంలో పెద్ద మార్పులు తీసుకువచ్చే ఈ డిజిటల్ హెల్త్ ప్రొఫైల్ వ్యవస్థ ద్వారా ప్రజలకు మరింత మెరుగైన వైద్య సేవలు అందుతాయని మంత్రి ఆశాభావం వ్యక్తం చేశారు. అధికారులు సమన్వయంతో పనిచేసి ఈ పైలట్ ప్రాజెక్టును ఆదర్శంగా నిలపాలని ఆయన సూచించారు.