అమెరికాలో విభిన్న వాతావరణ ప్రభావం.. కార్చిచ్చు, వరదలతో జనజీవనం అస్తవ్యస్తం

అమెరికాలో విభిన్న వాతావరణ పరిస్థితులు నెలకొన్నాయి. ఒకవైపు కార్చిచ్చు వేగంగా వ్యాపిస్తుండగా, మరోవైపు వరదలు పలు ప్రాంతాలను ముంచెత్తుతున్నాయి. దీంతో జనజీవనం తీవ్రంగా ప్రభావితమవుతోంది.

పశ్చిమ అమెరికాలోని కొలరాడో–యుటా సరిహద్దులోని నోల్స్, గోర్ ప్రాంతాల్లోని అడవులు, పర్వత ప్రాంతాల్లో చెలరేగిన కార్చిచ్చు వేగంగా విస్తరిస్తోంది. ఈ మంటలను అదుపులోకి తీసుకురావడానికి ప్రయత్నిస్తున్న సమయంలో ముగ్గురు అగ్నిమాపక సిబ్బంది ప్రాణాలు కోల్పోగా, మరో ఇద్దరు గాయపడ్డారని యూఎస్ వైల్డ్‌లైఫ్ ఫైర్ సర్వీస్ ఆదివారం తెలిపింది.

మంటలను ఆర్పే చర్యల్లో తమ సిబ్బంది పాల్గొంటున్నారని ఏజెన్సీ వెల్లడించింది. యుటా, ఆరిజోనా ప్రాంతాల్లోని అడవుల్లో కూడా కార్చిచ్చు వేగంగా వ్యాపిస్తోంది. శనివారం నాటికి సుమారు 144 చదరపు మైళ్లు (373 చదరపు కిలోమీటర్లు) విస్తీర్ణం అగ్నికి ఆహుతైందని అధికారులు తెలిపారు.

నష్టాన్ని అంచనా వేసేందుకు అగ్నిమాపక బృందాలతో కలిసి పనిచేస్తున్నట్లు అధికారులు పేర్కొన్నారు.

ఇదే సమయంలో కెంటకీ రాష్ట్రంలో భారీ వరదల కారణంగా నలుగురు మృతి చెందినట్లు గవర్నర్ ఆండీ బెషియర్ వెల్లడించారు. భారీ వర్షాల హెచ్చరికల నేపథ్యంలో పలు ప్రాంతాల్లో అత్యవసర పరిస్థితి ప్రకటించారు.