మహిళా బైకర్‌ను కారుతో ఢీకొట్టిన ఘటన.. నిందితుడి అరెస్టు

గురుగ్రామ్‌లో మహిళా బైకర్‌ సియాను ఓ కారు వెంబడించి ఢీకొట్టిన ఘటన తీవ్ర చర్చకు దారితీసింది. ఘటనకు సంబంధించిన వీడియోలు సామాజిక మాధ్యమాల్లో వైరల్‌ కావడంతో పోలీసులు దర్యాప్తు చేపట్టారు. ఈ కేసులో పరారీలో ఉన్న కారు డ్రైవర్‌ కల్యాణ్‌ బైస్లాను రాజస్థాన్‌లోని దౌసాలో పోలీసులు అదుపులోకి తీసుకున్నారు. అనంతరం తదుపరి విచారణ కోసం అతడిని గురుగ్రామ్‌కు తరలిస్తున్నారు.

అయితే తనపై వచ్చిన ఆరోపణలను కల్యాణ్‌ బైస్లా ఖండించాడు. సియా బైక్‌ను అత్యంత వేగంగా నడుపుతున్నారని, గంటకు 140 నుంచి 170 కిలోమీటర్ల వేగంతో ప్రయాణిస్తున్నారని అతడు పేర్కొన్నాడు. తాను ఉద్దేశపూర్వకంగా ఆమె బైక్‌ను ఢీకొట్టలేదని స్పష్టం చేశాడు. సోషల్‌ మీడియాలో వ్యూస్‌, ఫాలోవర్లు, పబ్లిసిటీ కోసం ఘటనను సియా పెద్దది చేస్తున్నారని ఆరోపించాడు.

కల్యాణ్‌ వాదనలను సియా తీవ్రంగా ఖండించారు. ప్రమాదం అనుకోకుండా జరిగి ఉంటే కారు ఎందుకు ఆపలేదని ప్రశ్నించారు. కారు ఢీకొట్టిన తర్వాత తన పరిస్థితిని తెలుసుకునే ప్రయత్నం కూడా చేయలేదని ఆరోపించారు. మహిళా బైకర్‌ను కావడంతోనే తనను ఉద్దేశపూర్వకంగా ఢీకొట్టారని ఆమె పేర్కొన్నారు. ఘటనకు సంబంధించిన వీడియోల్లో తన బైక్‌ను కారు ఢీకొట్టి అక్కడి నుంచి వెళ్లిపోవడం స్పష్టంగా కనిపిస్తోందని తెలిపారు.

ఈ ఘటనపై సియా కుటుంబసభ్యులు కూడా ఆగ్రహం వ్యక్తం చేశారు. నిందితుడు ఉద్దేశపూర్వకంగానే ఈ చర్యకు పాల్పడ్డాడని, ఇప్పుడు మీడియా ముందు వివరణలు ఇస్తున్నాడని మండిపడ్డారు. మరోవైపు, తాను ప్రచారం కోసం ఈ ఘటనను ఉపయోగించుకుంటున్నానన్న ఆరోపణలను సియా తోసిపుచ్చారు.

కల్యాణ్‌ బైస్లాపై గురుగ్రామ్‌ పోలీసులు హత్యాయత్నం కేసు నమోదు చేసినట్లు తెలిపారు. రాజస్థాన్‌లోని దౌసాలో అతడిని అదుపులోకి తీసుకున్న పోలీసులు కేసుకు సంబంధించిన పూర్తి వివరాలపై విచారణ కొనసాగిస్తున్నారు. వైరల్‌ వీడియోలు, ఇరువర్గాల వాదనలు, ఘటనకు సంబంధించిన ఇతర ఆధారాలను పోలీసులు పరిశీలిస్తున్నట్లు తెలుస్తోంది.