రాజ్యసభకు జనసేన నుంచి లింగమనేని రమేశ్‌?

ఆంధ్రప్రదేశ్‌ నుంచి ఖాళీ అయిన నాలుగు రాజ్యసభ స్థానాల భర్తీ ప్రక్రియలో రాజకీయ ఆసక్తి నెలకొంది. ఈ నాలుగు స్థానాల్లో మూడు స్థానాలను తెలుగుదేశం పార్టీ, ఒక స్థానాన్ని జనసేన పార్టీ తీసుకోవాలని కూటమి నిర్ణయించిన సంగతి తెలిసిందే. ఈ నేపథ్యంలో జనసేన తరఫున రాజ్యసభ అభ్యర్థిగా ప్రముఖ పారిశ్రామికవేత్త లింగమనేని రమేశ్‌ పేరు దాదాపు ఖరారైనట్లు రాజకీయ వర్గాల్లో చర్చ జరుగుతోంది.

రాజ్యసభ అభ్యర్థి ఎంపిక విషయంలో జనసేన అధినేత, ఉప ముఖ్యమంత్రి పవన్‌ కల్యాణ్‌ పలువురు నేతల పేర్లను పరిశీలించినట్లు సమాచారం. మధ్యలో మరికొందరు ప్రముఖ నాయకుల పేర్లు ప్రచారంలోకి వచ్చినప్పటికీ, చివరకు లింగమనేని రమేశ్‌కే అవకాశం దక్కే పరిస్థితులు కనిపిస్తున్నాయి.

వ్యాపార రంగంలో ప్రత్యేక గుర్తింపు పొందిన లింగమనేని రమేశ్‌కు రాష్ట్ర అభివృద్ధి, పారిశ్రామిక రంగంపై మంచి అవగాహన ఉండటం, కూటమి ప్రభుత్వానికి అవసరమైన వ్యూహాత్మక సహకారం అందించగల సామర్థ్యం ఉండటంతో ఆయన పేరును పరిశీలించినట్లు తెలుస్తోంది.

జనసేన ఆవిర్భావం నుంచి పార్టీకి పరోక్షంగా మద్దతుగా నిలిచిన వ్యక్తుల్లో లింగమనేని రమేశ్‌ ఒకరని రాజకీయ విశ్లేషకులు పేర్కొంటున్నారు. రాష్ట్ర ప్రయోజనాలను జాతీయ స్థాయిలో సమర్థంగా వినిపించగల అభ్యర్థిని ఎంపిక చేయాలనే ఉద్దేశంతో పవన్‌ కల్యాణ్‌ ఈ నిర్ణయం తీసుకున్నారని పార్టీ వర్గాలు చెబుతున్నాయి.

అభ్యర్థిత్వంపై అధికారిక ప్రకటన కోసం పార్టీ శ్రేణులు, అభిమానులు ఆసక్తిగా ఎదురుచూస్తున్నారు. ఇవాళ సాయంత్రం పవన్‌ కల్యాణ్‌ స్వయంగా లింగమనేని రమేశ్‌ పేరును ప్రకటించే అవకాశం ఉందని సమాచారం. అధికారిక ప్రకటన వెలువడితే, రాజ్యసభ ఎన్నికల్లో జనసేన తరఫున పోటీ చేసే అభ్యర్థిగా ఆయన పేరు ఖరారవుతుంది.