రాష్ట్రవ్యాప్తంగా సంచలనం సృష్టించిన నల్గొండ జిల్లా కొండమల్లేపల్లి మండల కేంద్రంలోని నాగార్జున పబ్లిక్ స్కూల్ ప్రిన్సిపల్ కె.రూపారెడ్డి హత్య కేసులో విస్తుపోయే విషయాలు వెలుగులోకి వచ్చాయి. ఆమె పనిచేస్తున్న పాఠశాలలోనే పదో తరగతి చదువుతున్న ఇద్దరు విద్యార్థులు ఈ హత్యకు పాల్పడినట్లు పోలీసులు ప్రాథమిక దర్యాప్తులో గుర్తించారు. డబ్బుల కోసం ప్రిన్సిపల్ను లక్ష్యంగా చేసుకుని ఈ దారుణానికి ఒడిగట్టినట్లు నిర్ధారించారు. ప్రస్తుతం ఇద్దరు విద్యార్థులను అదుపులోకి తీసుకుని పోలీసులు విచారిస్తున్నారు.
ఈ నెల 11న కొండమల్లేపల్లి మండలంలోని వేర్వేరు తండాలకు చెందిన ఇద్దరు విద్యార్థులు మాస్క్, హుడీ ధరించి రూపారెడ్డి ఇంటికి వెళ్లినట్లు పోలీసులు గుర్తించారు. వారిలో ఒకరు ఇంట్లోకి వెళ్లి డబ్బులు ఇవ్వాలని ఆమెను బెదిరించాడు. అయితే రూపారెడ్డి ప్రతిఘటించడంతో పాటు అతడి మాస్క్ తొలగిపోవడంతో విద్యార్థిని గుర్తించారు. దీంతో ఆమె కేకలు వేయడంతో తమ గుర్తింపు బయటపడుతుందని భయపడిన విద్యార్థి వెంట తీసుకెళ్లిన కత్తితో ఆమెపై దాడి చేశాడు. తీవ్ర గాయాలతో రూపారెడ్డి అక్కడికక్కడే మృతి చెందినట్లు పోలీసులు తెలిపారు.
హత్య అనంతరం ఇంట్లో ఉన్న రూ.2.20 లక్షల నగదును విద్యార్థులు తీసుకున్నట్లు దర్యాప్తులో తేలింది. అనంతరం బయట వేచి ఉన్న మరో విద్యార్థికి రూ.40 వేలు ఇచ్చినట్లు పోలీసులు గుర్తించారు. మిగిలిన నగదును తన వద్దే ఉంచుకున్నట్లు విచారణలో వెల్లడైనట్లు సమాచారం.
ఇద్దరు విద్యార్థులు గతంలోనూ చోరీలకు పాల్పడినట్లు పోలీసుల విచారణలో బయటపడింది. జల్సాలకు అలవాటు పడిన వారు డబ్బుల కోసం దొంగతనాలకు పాల్పడుతున్నట్లు గుర్తించారు. ఈ క్రమంలోనే రూపారెడ్డి ఇంట్లో నగదు ఉన్నట్లు తెలుసుకుని చోరీకి వెళ్లి.. ఆమె తమను గుర్తించడంతో హత్య చేసినట్లు పోలీసులు అనుమానిస్తున్నారు.
విద్యార్థులను అదుపులోకి తీసుకుని విచారిస్తున్న సమయంలో ఓ విద్యార్థి జేబులో రూ.1.60 లక్షల నగదును పోలీసులు గుర్తించి స్వాధీనం చేసుకున్నారు. ఆ నగదుపై రక్తపు మరకలు ఉండటంతో పోలీసులకు అనుమానం మరింత బలపడింది. రక్తపు మరకల గురించి ప్రశ్నించడంతో విద్యార్థులు జరిగిన విషయాన్ని అంగీకరించినట్లు సమాచారం.
ఈ కేసులో విద్యార్థుల పాత్రపై పోలీసులు మరింత లోతుగా దర్యాప్తు చేస్తున్నారు. హత్యకు ముందే ప్రణాళిక రూపొందించారా? రూపారెడ్డి ఇంట్లో నగదు ఉన్న విషయం వారికి ఎలా తెలిసింది? ఈ ఘటనలో మరెవరైనా ప్రమేయం ఉందా? అనే కోణాల్లో విచారణ కొనసాగుతోంది. స్వాధీనం చేసుకున్న నగదు, కత్తి తదితర ఆధారాలను పోలీసులు పరిశీలిస్తున్నారు.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
