45 ఏళ్ల నిరీక్షణకు ముగింపు.. సాధువు రూపంలో ఇంటికి చేరిన కుమారుడు

ఉత్తరాఖండ్‌లో హృదయాలను కదిలించే అరుదైన ఘటన చోటుచేసుకుంది. 15 ఏళ్ల వయసులో ఇంటిని విడిచి వెళ్లిపోయిన కుమారుడు, 45 ఏళ్ల తర్వాత తిరిగి తల్లి గడపకు చేరడంతో భావోద్వేగ క్షణాలు ఆవిష్కృతమయ్యాయి.

ఉత్తరాఖండ్‌లోని బెరినాగ్ సమీపంలోని దౌలిగడ్ గ్రామానికి చెందిన నంది దేవి అనే వృద్ధురాలి ఇంటికి ఓ సాధువు భిక్ష కోసం వచ్చాడు. ఇంటి ముందు నిలబడ్డ ఆ సాధువును క్షణకాలం గమనించిన ఆమె, అతడే చిన్నతనంలో తప్పిపోయిన తన కుమారుడు బుధి బల్లభ్ ఉపాధ్యాయ అని గుర్తించింది. దాదాపు ఐదు దశాబ్దాలుగా తన కుమారుడి కోసం ఎదురుచూస్తున్న ఆ తల్లి ఆనందంతో కన్నీళ్లు పెట్టుకుంది.

15 ఏళ్ల వయసులో ఇంటి నుంచి వెళ్లిపోయిన తర్వాత కుమారుడి కోసం ఎన్నో సంవత్సరాలు వెతికినా ఎలాంటి సమాచారం దొరకలేదని ఆమె ఆవేదన వ్యక్తం చేసింది. అయితే విధి మళ్లీ వారిని కలిపింది.

గ్రామస్థులతో మాట్లాడిన బుధి బల్లభ్ ఉపాధ్యాయ, ఇంటిని విడిచిన తర్వాత ట్రక్కు రవాణా పనుల్లో చేరినట్లు తెలిపాడు. అనంతరం ఆధ్యాత్మికత వైపు ఆకర్షితుడై దేశంలోని పలు పుణ్యక్షేత్రాలు సందర్శించానని చెప్పాడు. ప్రస్తుతం రాజస్థాన్‌లోని ఒక ఆలయంలో సాధువుగా జీవిస్తున్నట్లు వెల్లడించాడు.

సన్యాసం పూర్తిగా స్వీకరించే ముందు తల్లి చేతుల మీదుగా భిక్ష తీసుకోవాలని తన గురువు సూచించారని, అందుకే ఇన్నేళ్ల తర్వాత స్వగ్రామానికి వచ్చానని తెలిపాడు. తల్లిని కలుసుకోవడం జీవితంలో మరచిపోలేని అనుభూతి అని చెప్పాడు.

45 ఏళ్ల తర్వాత తల్లి-కొడుకులు కలుసుకున్న ఈ ఘటన గ్రామస్థులను భావోద్వేగానికి గురి చేసింది. ప్రేమ, అనుబంధం, నిరీక్షణకు ఈ సంఘటన ఒక మధురమైన ఉదాహరణగా నిలిచింది.