ఎంఎస్‌ఎంఈలకు కూటమి సర్కార్‌ భారీ ప్రోత్సాహం

రాష్ట్రంలో ఎంఎస్‌ఎంఈలను ప్రోత్సహించేందుకు కూటమి ప్రభుత్వం వేగంగా చర్యలు చేపడుతోంది. 2024 జూన్‌ నుంచి ఇప్పటి వరకు 2,876 చిన్న, సూక్ష్మ, మధ్యతరహా పరిశ్రమలకు భూములు కేటాయించినట్లు అధికారులు తెలిపారు. రెండేళ్లలో ఏటా సగటున 963.5 ఎకరాల చొప్పున భూములు కేటాయించినట్లు పేర్కొన్నారు.

ప్రతి కుటుంబం నుంచి ఒక పారిశ్రామికవేత్తను తయారు చేయాలన్న లక్ష్యంతో ప్రభుత్వం ముందుకు సాగుతోంది. ఇందుకోసం ప్రతి నియోజకవర్గంలో ఒక ఎంఎస్‌ఎంఈ పార్కు చొప్పున మొత్తం 175 పార్కులను అభివృద్ధి చేస్తోంది. స్థానికంగా అందుబాటులో ఉన్న భూమిని బట్టి ఒక్కో పార్కుకు 10 నుంచి 50 ఎకరాలు కేటాయించాలని ప్రతిపాదించింది.

2024 జూన్‌ నుంచి ఇప్పటివరకు ఏర్పాటైన 2,876 ఎంఎస్‌ఎంఈల ద్వారా రూ.8,060 కోట్ల పెట్టుబడులు వచ్చినట్లు ప్రభుత్వం వెల్లడించింది. ఈ పరిశ్రమల ద్వారా సుమారు 1.03 లక్షల మందికి ఉపాధి లభించనుంది. ఐదేళ్లలో ఎంఎస్‌ఎంఈ రంగం ద్వారా రూ.50 వేల కోట్ల పెట్టుబడులను ఆకర్షించి, కనీసం 5 లక్షల మందికి ఉపాధి కల్పించాలన్నది ప్రభుత్వ లక్ష్యం.

ఎంఎస్‌ఎంఈ పార్కుల్లో పరిశ్రమలు వేగంగా కార్యకలాపాలు ప్రారంభించేందుకు అవసరమైన మౌలిక సదుపాయాలను కల్పించనున్నారు. అంతర్గత రహదారులు, నీటి సరఫరా, విద్యుత్‌ పంపిణీ, వీధి దీపాలు, టెలికమ్యూనికేషన్లు, రెడీ టు ఫ్యాక్టరీ షెడ్లు వంటి సదుపాయాలను ఏపీఐఐసీ ఏర్పాటు చేయనుంది.

రాష్ట్రంలో పారిశ్రామిక అభివృద్ధితో పాటు పెద్ద సంఖ్యలో ఉపాధి అవకాశాలు కల్పించడంలో చిన్న పరిశ్రమలు కీలక పాత్ర పోషిస్తాయని ప్రభుత్వం భావిస్తోంది. అందుకే భూముల కేటాయింపు నుంచి మౌలిక వసతుల కల్పన వరకు ఎంఎస్‌ఎంఈలకు అనుకూల వాతావరణం కల్పించేందుకు చర్యలు తీసుకుంటోంది.

ఎంఎస్‌ఎంఈలకు సాంకేతిక పరిజ్ఞానం, నైపుణ్య శిక్షణ అందించేందుకు రతన్‌టాటా ఇన్నోవేషన్‌ హబ్‌ ద్వారా కార్యక్రమాలు చేపడుతున్నారు. అమరావతిలో ప్రధాన కార్యాలయంతో పాటు విజయవాడ, విశాఖపట్నం, తిరుపతి, రాజమహేంద్రవరం, అనంతపురంలో స్పోక్‌ సెంటర్లను ఏర్పాటు చేశారు.