ఇరాన్‌పై మళ్లీ దాడికి సిద్ధం.. నెతన్యాహు కీలక హెచ్చరికలు

పశ్చిమాసియాలో శాంతి పునరుద్ధరణ కోసం ఇరాన్‌తో అమెరికా చర్చలు జరిపేందుకు సిద్ధమవుతున్న వేళ ఇజ్రాయెల్ ప్రధాని నెతన్యాహు కీలక వ్యాఖ్యలు చేశారు. టెహ్రాన్ అణు కార్యక్రమంపై కఠిన వైఖరి అనుసరిస్తామని, అవసరమైతే ఇరాన్‌పై మళ్లీ దాడి చేస్తామని ఆయన హెచ్చరించారు.

మూడోసారి కూడా దాడులు చేయడానికి కావాల్సిన సామర్థ్యం తమ సైనిక దళాలకు ఉందని నెతన్యాహు పేర్కొన్నారు. గతంలో చేపట్టిన సైనిక చర్యలను ఆయన సమర్థించుకున్నారు.

ఇరాన్ అణ్వాయుధాలను సంపాదించకుండా నిరోధించే విషయంలో తాము స్వతంత్రంగా వ్యవహరిస్తామని ఇజ్రాయెల్ ప్రధాని స్పష్టం చేశారు. ఇందుకోసం ఇతర దేశాలపై ఆధారపడబోమని పరోక్షంగా అమెరికాను ఉద్దేశిస్తూ వ్యాఖ్యానించారు.

అణు కార్యక్రమాలపై దౌత్య ప్రయత్నాలు కొనసాగుతున్నప్పటికీ, ఇరాన్ అంగీకరించకపోతే సైనిక చర్య తప్పదని ఆయన హెచ్చరించారు. తమ దేశ భద్రతకు ముప్పు తెచ్చే ఏ చర్యనైనా అడ్డుకుంటామని పునరుద్ఘాటించారు. ఇరాన్ అణ్వాయుధ కార్యక్రమాన్ని కొనసాగించే ఒప్పందాలను ఇజ్రాయెల్ ఎప్పటికీ స్వాగతించబోదని తెలిపారు.

లెబనాన్ పర్యటనలో కీలక ఆదేశాలు

లెబనాన్‌పై ఇజ్రాయెల్ దాడులు ఆపాలని ఇరాన్ పేర్కొంటున్న నేపథ్యంలో, నెతన్యాహు మాత్రం తుది ఒప్పందం కుదిరే వరకు బీరుట్‌లో ఇజ్రాయెల్ బలగాలు కొనసాగుతాయని వెల్లడించారు. ఈ క్రమంలో దక్షిణ లెబనాన్‌లోని ఇజ్రాయెల్ ఆధీన ప్రాంతాలను ఆయన సందర్శించారు.

ఇరాన్ నుంచి అణు ముప్పు పూర్తిగా తొలగిపోయే వరకు దక్షిణ లెబనాన్‌ను వదిలి రావద్దని ఆయన సైన్యాన్ని ఆదేశించారు.