గోల్డెన్‌ గ్లోబ్స్‌లో ఏఐ వినియోగంపై కొత్త మార్గదర్శకాలు

సినీ ప్రపంచంలో అత్యంత ప్రతిష్ఠాత్మక అవార్డులలో ఒకటైన గోల్డెన్‌ గ్లోబ్స్‌ అవార్డ్స్‌ ఇప్పుడు ఆర్టిఫిషియల్‌ ఇంటెలిజెన్స్‌ (AI) వినియోగంపై కఠిన నిబంధనలు అమలు చేయడానికి సిద్ధమయ్యాయి. హాలీవుడ్‌లో ఏఐ టెక్నాలజీ వినియోగం వేగంగా పెరుగుతున్న నేపథ్యంలో, 2027 గోల్డెన్‌ గ్లోబ్స్‌ అవార్డుల కోసం కొత్త మార్గదర్శకాలను నిర్వాహకులు విడుదల చేశారు. ఇటీవల ఆస్కార్‌ అవార్డ్స్‌ సంస్థ కూడా ఇలాంటి నిబంధనలు తీసుకురావడంతో, ఇప్పుడు గోల్డెన్‌ గ్లోబ్స్‌ కూడా అదే దారిలో నడవడం చర్చనీయాంశమైంది.

కొత్త మార్గదర్శకాల ప్రకారం, సినిమాల నిర్మాణంలో ఏఐ వినియోగాన్ని పూర్తిగా నిషేధించకపోయినా, మానవ సృజనాత్మకతకే అత్యధిక ప్రాధాన్యం ఉంటుందని నిర్వాహకులు స్పష్టం చేశారు. సినిమాల్లో లేదా సిరీస్‌లలో ఏదైనా సన్నివేశం, వాయిస్‌ లేదా విజువల్‌ ఎఫెక్ట్స్‌లో ఏఐ ఉపయోగిస్తే, ఆ విషయాన్ని తప్పనిసరిగా వెల్లడించాల్సి ఉంటుంది. ముఖ్యంగా నటీనటుల ముఖ కవళికలు, వాయిస్‌, రూపాన్ని ఏఐ ద్వారా మార్చినట్లయితే, ఆ వివరాలను అధికారికంగా తెలియజేయాలని నిబంధనల్లో పేర్కొన్నారు.

అవార్డుల ఎంపికలో కూడా మానవ నటనకే ప్రాధాన్యం ఇవ్వనున్నారు. ఏఐ సహాయంతో నటనను మెరుగుపరిచినా, అసలు నటుడి ప్రదర్శనను ప్రధాన ప్రమాణంగా పరిగణిస్తామని గోల్డెన్‌ గ్లోబ్స్‌ కమిటీ వెల్లడించింది. అనుమతి లేకుండా ఎవరి వాయిస్‌, రూపాన్ని డిజిటల్‌గా వినియోగించినా అలాంటి ఎంట్రీలను అంగీకరించబోమని స్పష్టం చేసింది. ఈ నిబంధనలు కేవలం నటనకే కాకుండా దర్శకత్వం, రచన, సంగీతం, యానిమేషన్‌ వంటి విభాగాలకు కూడా వర్తిస్తాయని తెలిపింది.

ఏఐ టెక్నాలజీని సృజనాత్మక ప్రక్రియకు సహాయక సాధనంగా మాత్రమే చూడాలని, దానికి అధిక ప్రాధాన్యం ఇవ్వకూడదని గోల్డెన్‌ గ్లోబ్స్‌ సంస్థ అభిప్రాయపడింది. భవిష్యత్తులో సినీ రంగంలో ఏఐ వినియోగం మరింత పెరిగే అవకాశాల మధ్య, ఈ నిర్ణయం హాలీవుడ్‌తో పాటు ప్రపంచ సినీ పరిశ్రమలో కూడా కొత్త చర్చకు దారితీసింది. వచ్చే ఏడాది జనవరి 10న గోల్డెన్‌ గ్లోబ్స్‌ అవార్డుల వేడుక జరగనుంది.