రబీ పంటలకు ఎల్‌నినో ముప్పు.. ఉత్పత్తిపై ప్రభావం

రబీ సీజన్‌కు ఎల్‌నినో ప్రభావం సవాలుగా మారే అవకాశముందని కేంద్ర వ్యవసాయశాఖ అంచనా వేస్తోంది. ముఖ్యంగా వర్షాధార ప్రాంతాల్లో పంటల దిగుబడిపై ప్రతికూల ప్రభావం పడే అవకాశం ఉందని వ్యవసాయశాఖ కార్యదర్శి అతీశ్‌ చంద్ర తెలిపారు. ఖరీఫ్‌లో ఇప్పటికే పలు రాష్ట్రాలు అధిక తేమ, వర్షాభావం వంటి భిన్న వాతావరణ పరిస్థితులను ఎదుర్కొన్నాయని ఆయన పేర్కొన్నారు.

రబీ పంటల సాగు సాధారణంగా 6.38 కోట్ల హెక్టార్లలో జరుగుతుంది. ఇందులో సుమారు 3 కోట్ల హెక్టార్లలో గోధుమలు, 1.4 కోట్ల హెక్టార్లలో పప్పులు, 87 లక్షల హెక్టార్లలో నూనెగింజలు సాగవుతాయి. వాతావరణ పరిస్థితులను దృష్టిలో ఉంచుకుని రబీ సాగు ప్రణాళికలను మార్చుకోవాలని కేంద్రం సూచించింది.

మరోవైపు కొలంబియా యూనివర్సిటీకి చెందిన ఇంటర్నేషనల్‌ రీసెర్చ్‌ ఇన్‌స్టిట్యూట్‌ ఫర్‌ క్లైమేట్‌ అండ్‌ సొసైటీ (IRI) అంచనాల ప్రకారం 2026 చివరి నుంచి 2027 ప్రారంభం వరకు బలమైన ఎల్‌నినో పరిస్థితులు ఏర్పడే అవకాశం ఉంది. అయితే ఎల్‌నినో ప్రభావాన్ని కేవలం నినో 3.4 సూచికతోనే నిర్ణయించలేమని, హిందూ మహాసముద్ర డైపోల్‌ (IOD), రుతుపవనాల గమనం, ప్రాంతీయ సముద్ర ఉష్ణోగ్రతలు, శీతాకాల పరిస్థితులు కూడా కీలకమని నిపుణులు చెబుతున్నారు.

ఎల్‌నినో కారణంగా సాధారణంగా భారత్‌లో రుతుపవనాలు బలహీనపడే అవకాశం ఉండటంతో వ్యవసాయ ఉత్పత్తిపై ప్రభావం పడవచ్చు. పప్పులు, నూనెగింజలు, ఉద్యాన ఉత్పత్తుల దిగుమతులు మరింత పెరిగే అవకాశముందని కేంద్ర వ్యవసాయశాఖ తెలిపింది.