చలానా కట్టకపోతే కరెంట్‌ బిల్లులో బాదుడే!

ట్రాఫిక్‌ నిబంధనల ఉల్లంఘనలకు విధించిన ఈ-చలానాల బకాయిల వసూళ్లపై సుప్రీంకోర్టు కీలక సూచనలు చేసింది. దేశవ్యాప్తంగా భారీగా పెండింగ్‌లో ఉన్న జరిమానాలను సమర్థంగా వసూలు చేయడంతో పాటు, వాహనదారుల్లో నిబంధనల పట్ల బాధ్యత పెంచేందుకు కఠిన చర్యలు అవసరమని ధర్మాసనం పేర్కొంది. జస్టిస్‌ జేబీ పార్దీవాలా, జస్టిస్‌ కేవీ విశ్వనాథన్‌ ధర్మాసనం ఈ అంశంపై విచారణ సందర్భంగా పలు మార్గాలను సూచించింది.

ఎలక్ట్రానిక్‌ మానిటరింగ్‌ ద్వారా రాష్ట్రాలు, కేంద్రపాలిత ప్రాంతాలు సుమారు రూ.45 వేల కోట్ల విలువైన ఈ-చలానాలు జారీ చేయగా, అందులో సుమారు రూ.25 వేల కోట్లు మాత్రమే వసూలయ్యాయని కోర్టు దృష్టికి వచ్చింది. దాదాపు రూ.20 వేల కోట్ల జరిమానాలు ఇంకా పెండింగ్‌లో ఉన్న నేపథ్యంలో కేవలం చలానాలు జారీ చేయడం సరిపోదని, వాటి వసూళ్లపై దృష్టి పెట్టాల్సిన అవసరాన్ని కోర్టు ప్రస్తావించింది.

బకాయి ఉన్న ట్రాఫిక్‌ చలానాలను సంబంధిత వ్యక్తుల విద్యుత్‌ బిల్లులతో అనుసంధానించే అవకాశాన్ని కూడా కోర్టు సూచించింది. విద్యుత్‌ బిల్లు చెల్లింపుతో అనుసంధానం చేస్తే పెండింగ్‌ జరిమానాల వసూళ్లు మెరుగుపడే అవకాశం ఉంటుందని ధర్మాసనం అభిప్రాయపడింది. అయితే ఇది ప్రస్తుతం సూచన/పరిశీలన అంశమే, దేశవ్యాప్తంగా అమల్లోకి వచ్చిన కొత్త నిబంధనగా భావించకూడదు.

అదేవిధంగా చలానా బకాయిలు ఉన్న వాహనాలపై పరివాహన్‌ పోర్టల్‌లో ఫ్లాగ్‌ చేయడం, యాజమాన్య హక్కు బదిలీని నిలిపివేయడం, ఆర్‌సీకి సంబంధించిన కొన్ని సేవలను పరిమితం చేయడం వంటి చర్యలను పరిశీలించాలని కోర్టు సూచించింది. వాహన ఫిట్‌నెస్‌ సర్టిఫికెట్‌, రిజిస్ట్రేషన్‌కు సంబంధించిన సేవలు, ఇతర ఆన్‌లైన్‌ సేవలను కూడా బకాయిల చెల్లింపుతో అనుసంధానించే అంశాన్ని ప్రస్తావించింది.

తరచూ ట్రాఫిక్‌ నిబంధనలు ఉల్లంఘించే వారిపై డ్రైవింగ్‌ లైసెన్స్‌ పునరుద్ధరణను నిలిపివేయడం లేదా తగిన చర్యలు తీసుకోవడం, బకాయిలున్న వాహనాలను తనిఖీలకు గురిచేయడం వంటి మార్గాలను కూడా కోర్టు చర్చించింది. పెండింగ్‌ చలానాల వసూళ్లకు రాష్ట్రాలు, కేంద్రపాలిత ప్రాంతాలు స్పష్టమైన కార్యాచరణ ప్రణాళికను రూపొందించాల్సిన అవసరాన్ని ధర్మాసనం పేర్కొంది.