ప్రతి పాత్ర ఓ హీరోనే.. ‘సీతారామయ్య గారి మనవరాలు’

ఒక అమ్మాయి చుట్టూ తిరిగే కథగా కాకుండా.. ఓ పూర్తిస్థాయి జీవితాన్ని ఆవిష్కరించే ప్రయత్నమే ‘సీతారామయ్య గారి మనవరాలు’ అని దర్శకుడు మలినేని రాధాకృష్ణ అన్నారు. ఆయన దర్శకత్వంలో తెరకెక్కిన ఈ కొత్త ధారావాహిక ఈటీవీలో సోమవారం రాత్రి 8.30 గంటలకు ప్రారంభమైంది. తొలి రోజే ప్రేక్షకుల నుంచి విశేష ఆదరణ లభించింది. ధారావాహిక ప్రారంభానికి ముందు హైదరాబాద్‌లో ప్రత్యేక కార్యక్రమాన్ని నిర్వహించారు. ఇందులో రెండు ఎపిసోడ్లను అతిథులు, సినీ, టీవీ రంగ ప్రముఖుల సమక్షంలో ప్రత్యేకంగా ప్రదర్శించారు.

ఈ సందర్భంగా దర్శకుడు మలినేని రాధాకృష్ణ మాట్లాడుతూ.. సాధారణంగా ప్రతి ధారావాహికలోనూ భావోద్వేగాలు, డ్రామా ఉంటాయని, అయితే ‘సీతారామయ్య గారి మనవరాలు’లో వాటికి మించి నేటితరానికి అవసరమైన విలువలను చెప్పే ప్రయత్నం చేశామని తెలిపారు. కథలోని ప్రతి పాత్రకు ప్రత్యేకమైన ప్రాధాన్యం ఉండేలా రూపకల్పన చేసినట్లు చెప్పారు.

‘‘మహాభారతంలో ప్రతి పాత్రకీ ఎంతో ప్రాధాన్యం ఉంటుంది. అదే తరహాలో ఈ ధారావాహికలోని పాత్రలను రాశాం. సీతారామయ్య నుంచి శివ వరకూ ప్రతి పాత్ర కూడా ఇందులో హీరోనే. కథను ముందుకు తీసుకెళ్లడంలో ప్రతి పాత్రకూ కీలకమైన పాత్ర ఉంటుంది. అందుకే ప్రేక్షకులకు ప్రతి పాత్రతోనూ ఒక అనుబంధం ఏర్పడుతుంది’’ అని దర్శకుడు వివరించారు.

ఈటీవీ వంటి పెద్ద వేదికపై ఎన్నో అద్భుతమైన కార్యక్రమాలు, కథలు ప్రేక్షకుల ముందుకు వచ్చాయని ఆయన అన్నారు. అదే వేదికపై కొత్తతరానికి మన విలువలు, మన భావోద్వేగాలను అందించాలనే సంకల్పంతో ఈ ధారావాహికను రూపొందించినట్లు చెప్పారు.

ఈ ధారావాహికలో కథానాయిక జీవితంలో ఎదురైన ఓ గాయం కీలకంగా మారుతుందని దర్శకుడు తెలిపారు. ఆ గాయం కారణంగా ఆమె గతాన్ని, వర్తమానాన్ని మరిచిపోతూ ఉంటుందని చెప్పారు. అలాంటి పరిస్థితుల్లో ఎన్నో కష్టాలు, సవాళ్లు ఎదురైనా తన సంకల్పాన్ని నెరవేర్చుకునేందుకు ఆమె ఎలా పోరాడింది? జీవితంలో ఎదురయ్యే పరిస్థితులను ఎలా అధిగమించింది? అనే అంశాలు కథలో ఆసక్తిని పెంచుతాయని వివరించారు. కథలో ఎన్నో ప్రత్యేకతలు ఉన్నాయని చెప్పారు.

ఈ కార్యక్రమానికి ఈటీవీ డైరెక్టర్‌ సుజయ్‌ చెరుకూరి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ.. రెండు ఎపిసోడ్లు చూసిన తర్వాత ప్రేక్షకులకు సినిమా చూసిన అనుభూతి కలుగుతుందని నమ్ముతున్నట్లు తెలిపారు. కథలోని భావోద్వేగాలు తొలి రెండు ఎపిసోడ్లలోనే స్పష్టంగా కనిపించాయని అన్నారు.

బలమైన భావోద్వేగాలు ఎలాంటి ప్రేక్షకుడినైనా కథలో లీనం చేసి, ఆసక్తిగా చూసేలా చేస్తాయని సుజయ్‌ చెరుకూరి పేర్కొన్నారు. ఇదే భావోద్వేగం, గాఢతను ధారావాహిక ముందుకు సాగే కొద్దీ కొనసాగిస్తే మొత్తం బృందానికి మంచి ఫలితాలు దక్కుతాయని ఆకాంక్షించారు. నటీనటులు, సాంకేతిక బృందానికి అభినందనలు, శుభాకాంక్షలు తెలిపారు.

ఈ కార్యక్రమంలో నటీనటులు శివపార్వతి, ప్రశాంత్‌, మౌనిక, రచిత, శ్రీధర్‌, వెంకట చలపతి తదితరులు పాల్గొన్నారు. స్క్రీన్‌ప్లే, సంభాషణలను మహేంద్ర వర్మ అందించారు.

కుటుంబ బంధాలు, విలువలు, భావోద్వేగాలు, జీవితంలో ఎదురయ్యే సవాళ్లను మేళవిస్తూ రూపొందించిన ఈ ధారావాహిక రానున్న రోజుల్లో ప్రేక్షకులను ఎలా ఆకట్టుకుంటుందో చూడాలి.