కర్ణాటక నుంచి రాజ్యసభకు షర్మిల?

కర్ణాటక నుంచి ఖాళీ కానున్న రాజ్యసభ స్థానాల భర్తీకి కాంగ్రెస్‌ అధిష్ఠానం కసరత్తును ముమ్మరం చేసింది. జూన్‌ 18న జరగనున్న ఎన్నికల నేపథ్యంలో టికెట్‌ ఆశిస్తున్న నేతలు ఢిల్లీలో పార్టీ పెద్దలతో సంప్రదింపులు జరుపుతున్నారు. రాష్ట్ర అసెంబ్లీలో కాంగ్రెస్‌కు స్పష్టమైన మెజారిటీ ఉండటంతో కనీసం మూడు రాజ్యసభ స్థానాలను గెలుచుకునే అవకాశం ఉంది. దీంతో అభ్యర్థుల ఎంపికపై తీవ్ర పోటీ నెలకొంది.

ఈ నేపథ్యంలో ఆంధ్రప్రదేశ్‌ కాంగ్రెస్‌ కమిటీ అధ్యక్షురాలు వైఎస్‌ షర్మిల పేరు కూడా పరిశీలనలో ఉన్నట్లు పార్టీ వర్గాల్లో ప్రచారం జరుగుతోంది. ఇటీవల ఆమె కాంగ్రెస్‌ అగ్రనేత రాహుల్‌ గాంధీని కలిసిన సందర్భంగా రాజ్యసభ అవకాశాలపై చర్చ జరిగినట్లు సమాచారం. షర్మిలకు జాతీయ స్థాయిలో బాధ్యతలు అప్పగించాలనే ఆలోచనలో పార్టీ నాయకత్వం ఉన్నట్లు కూడా రాజకీయ వర్గాలు విశ్లేషిస్తున్నాయి.

మరోవైపు ఏఐసీసీ అధ్యక్షుడు మల్లికార్జున ఖర్గే ప్రస్తుత రాజ్యసభ పదవీకాలం ముగియనున్న నేపథ్యంలో ఆయనకు మరోసారి అవకాశం ఇవ్వడం దాదాపు ఖాయంగా కనిపిస్తోంది. ఖర్గేకు కర్ణాటక నుంచి మళ్లీ రాజ్యసభకు పంపాలని కాంగ్రెస్‌ అధిష్ఠానం నిర్ణయించినట్లు తెలుస్తోంది.

ఇటీవల ముఖ్యమంత్రి పదవికి రాజీనామా చేసిన సిద్ధరామయ్యకు కూడా రాజ్యసభ సీటు ఆఫర్‌ చేసినప్పటికీ ఆయన ఆసక్తి చూపలేదని సమాచారం. దీంతో మిగిలిన రెండు స్థానాల కోసం పలువురు సీనియర్‌ నేతలు ప్రయత్నాలు ముమ్మరం చేశారు. రాష్ట్రంలో డీకే శివకుమార్‌ నాయకత్వంలో కొత్త ప్రభుత్వ ఏర్పాటుకు సన్నాహాలు జరుగుతున్న నేపథ్యంలో మంత్రివర్గంలో చోటు దక్కని సీనియర్‌ నాయకులకు రాజ్యసభ అవకాశం కల్పించే అంశాన్ని అధిష్ఠానం పరిశీలిస్తోంది.

అలాగే సిద్ధరామయ్య సతీమణి పార్వతి పేరును కూడా కాంగ్రెస్‌ పెద్దలు పరిశీలిస్తున్నట్లు ప్రచారం జరుగుతోంది. సామాజిక సమీకరణాలు, ప్రాంతీయ సమతుల్యత, పార్టీకి చేసిన సేవలు వంటి అంశాలను దృష్టిలో ఉంచుకుని అభ్యర్థుల ఎంపిక జరగనుందని పార్టీ వర్గాలు చెబుతున్నాయి.

రాజ్యసభతో పాటు ఎమ్మెల్సీ ఎన్నికలకు సంబంధించిన నోటిఫికేషన్‌ ఇప్పటికే విడుదలైంది. అభ్యర్థుల ఎంపికపై తుది నిర్ణయం తీసుకున్న అనంతరం కాంగ్రెస్‌ అధిష్ఠానం అధికారిక జాబితాను ప్రకటించనుంది. దీంతో కర్ణాటక కాంగ్రెస్‌లో రాజ్యసభ టికెట్ల వ్యవహారం రాజకీయంగా హాట్‌టాపిక్‌గా మారింది.