ఇరాన్ చేతిలో కీలక ఆయుధంగా హర్మూజ్ జలసంధి: అమెరికా నివేదిక సంచలనం

పశ్చిమాసియా సంక్షోభం, అమెరికాతో కాల్పుల విరమణ నేపథ్యంలో ఇరాన్ అణ్వాయుధం కంటే శక్తివంతమైన వ్యూహాత్మక ఆయుధాన్ని సాధించిందని అమెరికా ఇంటెలిజెన్స్ వర్గాలు అంచనా వేస్తున్నాయి. చమురు రవాణాకు అత్యంత కీలకమైన హర్మూజ్ జలసంధి (Strait of Hormuz)పై ఇరాన్ తన పట్టును మరింత బిగించినట్లు నివేదికలు చెబుతున్నాయి.

అమెరికా మీడియా కథనాల ప్రకారం, ఇరాన్ తన ఇష్టానుసారం ఈ జలసంధిని మూసివేసే సామర్థ్యాన్ని అభివృద్ధి చేసుకుందని ఇంటెలిజెన్స్ నివేదికలో పేర్కొన్నట్లు తెలుస్తోంది. ఒప్పందం ఉన్నా లేకపోయినా, హర్మూజ్ ద్వారా ప్రపంచ ఆర్థిక వ్యవస్థను ప్రభావితం చేసే శక్తి ఇరాన్‌కు ఉందని ఆ నివేదిక హెచ్చరించింది.

గల్ఫ్ దేశాల ఇంధన మౌలిక సదుపాయాలపై దాడులను వ్యూహాత్మకంగా వినియోగించుకోవడం, అలాగే అమెరికా పరిమితులను తనకు అనుకూలంగా మలుచుకోవడం ఇరాన్‌కు అదనపు బలంగా మారిందని విశ్లేషించింది. ఈ కారణంగా హర్మూజ్‌పై నియంత్రణ అణ్వాయుధ సామర్థ్యానికి సమానమైన లేదా అంతకంటే ఎక్కువ ప్రభావం చూపగలదని సూచించింది.

ఇటీవల అమెరికా–ఇరాన్ ఒప్పంద చర్చల్లో హర్మూజ్ జలసంధి కీలక అంశంగా మారింది. దాన్ని పూర్తిగా తెరచివేయించేందుకు ఇరాన్‌తో అమెరికా తీవ్రమైన చర్చలు జరిపినట్లు సమాచారం. ఈ పరిణామాల నేపథ్యంలో ఇరాన్ వ్యూహాత్మక ప్రాధాన్యం మరింత స్పష్టమవుతోందని అంతర్జాతీయ విశ్లేషకులు భావిస్తున్నారు.

ఇక అమెరికా ఉపాధ్యక్షుడు జేడీ వాన్స్ మాట్లాడుతూ, ఇరాన్ వద్ద అణ్వాయుధం ఉండకూడదన్నదే తమ ప్రధాన లక్ష్యమని పేర్కొన్నారు. హర్మూజ్ జలసంధి ఎప్పుడూ తెరిచి ఉండాలని ఆయన స్పష్టం చేశారు. ఇరాన్ సరైన విధంగా వ్యవహరిస్తే ఒప్పందంలో అనేక ప్రయోజనాలు ఉంటాయని, లేకపోతే ఎలాంటి ప్రయోజనాలు ఉండవని ఆయన వ్యాఖ్యానించారు. అయితే ఆ ప్రయోజనాల వివరాలను మాత్రం వెల్లడించలేదు.

ఈ ఒప్పందంపై రెండు రోజుల్లో అధికారిక సంతకాలు జరిగే అవకాశం ఉండటంతో హర్మూజ్ అంశం అంతర్జాతీయ స్థాయిలో మరింత చర్చనీయాంశంగా మారింది.