ముగ్గురు కొడుకులు &#8211; ఒక తండ్రి ఉపాయం: ఐక్యత లేన�

అనగనగా ఒక గ్రామంలో సోమయ్య అనే ముసలి రైతు ఉండేవాడు. ఆయనకు ముగ్గురు కొడుకులు. ఆ ముగ్గురూ చాలా ఆరోగ్యవంతులు, కష్టపడే తత్వం ఉన్నవారే, కానీ వారిలో ఒకరితో ఒకరికి అస్సలు పడేది కాదు. చిన్న విషయానికి కూడా ముగ్గురూ ఒకరితో ఒకరు గొడవ పడేవారు.

సోమయ్య తన కొడుకుల ప్రవర్తన చూసి చాలా ఆందోళన చెందేవాడు. “నేను ఉన్నంత కాలం వీరికి ఏ భయం లేదు, కానీ నా తర్వాత వీరు ఇలాగే విడిపోయి ఉంటే ఎవరైనా వీరిని సులభంగా మోసం చేస్తారు” అని భయపడేవాడు. వారికి ఎన్ని సార్లు చెప్పినా ప్రయోజనం లేకపోయింది.

చివరికి సోమయ్య ఒక ఉపాయం ఆలోచించాడు. ఒకరోజు తన ముగ్గురు కొడుకులను పిలిచాడు. వారితో ఇలా అన్నాడు, “నాన్నలారా! మీలో ఎవరికి ఎక్కువ బలం ఉందో చూడాలనుకుంటున్నాను. ఇక్కడ పది కర్రలతో కట్టిన ఒక కట్ట ఉంది. దీనిని మీలో ఎవరు విరుస్తారో చూద్దాం” అన్నాడు.

ముందుగా పెద్ద కొడుకు వచ్చాడు. తన శక్తి అంతా ఉపయోగించి ఆ కర్రల కట్టను విరవడానికి ప్రయత్నించాడు. కానీ అది సాధ్యం కాలేదు. ఆ తర్వాత రెండో కొడుకు, మూడో కొడుకు కూడా ప్రయత్నించారు కానీ ఆ కట్టను విరవలేకపోయారు.

అప్పుడు సోమయ్య ఆ కట్టను విప్పి, ఒక్కో కర్రను ఒక్కో కొడుకు చేతికి ఇచ్చి, “ఇప్పుడు విరవండి” అన్నాడు. ముగ్గురూ చాలా సులభంగా ఆ కర్రలను విరిచేశారు.అప్పుడు సోమయ్య వారితో ఇలా అన్నాడు: “చూశారా! కర్రలన్నీ కలిసి కట్టగా ఉన్నప్పుడు మీరు వాటిని విరవలేకపోయారు. కానీ ఎప్పుడైతే అవి విడిపోయాయో, మీరు వాటిని సులభంగా విరిచేశారు. మీరు కూడా అంతే.. అందరూ కలిసి ఉంటే మిమ్మల్ని ఎవరూ ఏమీ చేయలేరు. కానీ ఇలాగే విడిపోయి గొడవ పడితే, బయటి వారు మిమ్మల్ని సులభంగా ఓడించి లాభం పొందుతారు.”

తండ్రి మాటల్లోని అంతరార్థాన్ని గ్రహించిన కొడుకులు, ఆ రోజు నుండి గొడవలు మానేసి కలిసి మెలిసి ఉండటం మొదలుపెట్టారు.

నీతి:

కలిసి ఉంటే కలదు సుఖం. ఐకమత్యమే మహాబలం.