తిరుపతి విమానాశ్రయం ప్రైవేటు నిర్వహణకు

తిరుమలకు వచ్చే భక్తులు, పర్యాటకుల సంఖ్య పెరుగుతున్న నేపథ్యంలో తిరుపతి విమానాశ్రయంలో ప్రయాణికుల రద్దీ కూడా పెరుగుతోంది. ఈ నేపథ్యంలో విమానాశ్రయ నిర్వహణ, అభివృద్ధి బాధ్యతలను ప్రైవేటు భాగస్వామికి అప్పగించే ప్రక్రియను కేంద్రం చేపడుతోంది. తిరుపతిని తమిళనాడులోని తిరుచిరాపల్లి అంతర్జాతీయ విమానాశ్రయంతో ఒక బండిల్‌గా రూపొందించి ప్రైవేటు నిర్వహణకు ఇవ్వాలని ప్రతిపాదించింది.

ఎయిర్‌పోర్ట్స్ అథారిటీ ఆఫ్ ఇండియా పరిధిలోని 11 విమానాశ్రయాలను ఐదు బండిల్స్‌గా విభజించి ఒక్కో బండిల్‌ను ఒకే ప్రైవేటు రాయితీదారుకు అప్పగించే విధానాన్ని కేంద్రం ప్రతిపాదించింది. రద్దీ ఎక్కువగా ఉన్న విమానాశ్రయాలను తక్కువ రద్దీ ఉన్న విమానాశ్రయాలతో కలపడం ద్వారా నిర్వహణ, పెట్టుబడులు, వాణిజ్య కార్యకలాపాలకు అవకాశాలు పెంచడం ఈ విధానంలోని ప్రధాన ఉద్దేశంగా పేర్కొంటున్నారు.

తిరుపతి విమానాశ్రయం నుంచి హైదరాబాద్, బెంగళూరు, దిల్లీ, ముంబయి వంటి ప్రధాన నగరాలతో పాటు విజయవాడ, విశాఖపట్నం తదితర ప్రాంతాలకు విమాన సర్వీసులు ఉన్నాయి. ప్రయాణికుల రద్దీ, భూమి లభ్యత, వాణిజ్య సామర్థ్యం, ఆర్థిక పనితీరు వంటి అంశాలను పరిగణనలోకి తీసుకుని విమానాశ్రయాల బండ్లింగ్‌ను రూపొందిస్తున్నట్లు సమాచారం.

ప్రైవేటు భాగస్వామ్యం ద్వారా విమానాశ్రయాల్లో మౌలిక సదుపాయాల అభివృద్ధి, ఆధునికీకరణ, రిటైల్, కార్గో, ఇతర వాణిజ్య కార్యకలాపాల విస్తరణకు ప్రాధాన్యం ఇవ్వనున్నారు. ప్రయాణికుల సంఖ్య పెరిగే కొద్దీ అవసరమైన అభివృద్ధి పనులను చేపట్టే బాధ్యత కూడా ప్రైవేటు ఆపరేటర్‌పై ఉండేలా వ్యవస్థను రూపొందించనున్నారు.

ఆంధ్రప్రదేశ్‌లో ఏఏఐ నిర్వహణలో ఉన్న కడప, రాజమహేంద్రవరం విమానాశ్రయాలను కూడా భవిష్యత్తులో ఇదే బండ్లింగ్ విధానంలో ప్రైవేటు భాగస్వామ్యానికి అప్పగించే అవకాశాలపై పరిశీలన జరుగుతున్నట్లు సమాచారం. ప్రస్తుతం ఈ విమానాశ్రయాల్లో మౌలిక సదుపాయాల అభివృద్ధి పనులు కొనసాగుతున్నాయి. ప్రయాణికుల రద్దీ, విమాన సర్వీసులు పెరిగిన తర్వాత వీటినీ బండిల్స్‌లో చేర్చే అవకాశం ఉందని అధికారులు చెబుతున్నారు. AAI అధికారిక సమాచారంలో తిరుపతి, రాజమహేంద్రవరం, కడప విమానాశ్రయాలు AAI నిర్వహణ పరిధిలో ఉన్నట్లు నమోదైంది.