ఆగస్ట్ నెల శ్రీవారి దర్శన టికెట్లు విడుదల చేసిన టీటీడీ

తిరుమలలో శ్రీవారి ఆర్జిత సేవా టికెట్ల (సుప్రభాతం, తోమాల, అర్చన, అష్టదళ పాదపద్మారాధన సేవ) ఆగస్టు నెల కోటాను టీటీడీ సోమవారం ఉదయం 10.00 గంటలకు ఆన్‌లైన్‌లో విడుదల చేసింది. ఈ సేవా టికెట్ల కోసం ఎలక్ట్రానిక్ డిప్ నమోదు ప్రక్రియ ఈ నెల 20వ తేదీ ఉదయం 10 గంటల వరకు అందుబాటులో ఉంటుందని తెలిపింది.

ఎలక్ట్రానిక్ డిప్‌లో ఎంపికైన భక్తులు మే 20 నుంచి 22వ తేదీ మధ్యాహ్నం 12.00 గంటల లోపు నగదు చెల్లిస్తేనే టికెట్లు మంజూరు అవుతాయని టీటీడీ స్పష్టం చేసింది.

ఆర్జిత సేవా టికెట్ల షెడ్యూల్

మే 21వ తేదీ ఉదయం 10 గంటలకు కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవ, సాలకట్ల పవిత్రోత్సవాల టికెట్ల కోటాను ఆన్‌లైన్‌లో విడుదల చేయనుంది. అదే సమయంలో వార్షిక పవిత్రోత్సవాల టికెట్లు కూడా అందుబాటులోకి వస్తాయి.

అదే రోజు మధ్యాహ్నం 3.00 గంటలకు వర్చువల్ సేవలు మరియు వాటికి సంబంధించిన దర్శన స్లాట్ల కోటాను విడుదల చేయనున్నారు.

అంగ ప్రదక్షిణ టోకెన్లు

మే 23వ తేదీ ఉదయం 10 గంటలకు అంగ ప్రదక్షిణ టోకెన్ల కోటా విడుదల అవుతుంది. అదే రోజు 11.00 గంటలకు శ్రీవాణి ట్రస్టు దర్శన టికెట్ల కోటా అందుబాటులోకి వస్తుంది. మధ్యాహ్నం 3.00 గంటలకు వయోవృద్ధులు, దివ్యాంగులు, దీర్ఘకాలిక వ్యాధులతో బాధపడుతున్న భక్తుల కోసం ఉచిత ప్రత్యేక దర్శన టోకెన్ల కోటాను విడుదల చేస్తారు.

ప్రత్యేక ప్రవేశ దర్శన టికెట్లు

మే 25వ తేదీ ఉదయం 10 గంటలకు రూ.300 ప్రత్యేక ప్రవేశ దర్శనం (SSD) టికెట్ల కోటాను విడుదల చేయనున్నారు. అదే రోజు మధ్యాహ్నం 3.00 గంటలకు తిరుమల, తిరుపతిలలో భక్తుల వసతి గదుల కోటాను ఆన్‌లైన్‌లో అందుబాటులో ఉంచుతారు.

శ్రీవారి ఆర్జిత సేవలు, దర్శన టికెట్లు, వసతి గదులను కేవలం టీటీడీ అధికారిక వెబ్‌సైట్ https://ttdevasthanams.ap.gov.in ద్వారా మాత్రమే బుక్ చేసుకోవాలని అధికారులు స్పష్టం చేశారు. నకిలీ వెబ్‌సైట్లను నమ్మి మోసపోవద్దని భక్తులకు హెచ్చరించారు.