పాము – ముంగిస పోరాటం… నీతి చెప్పే కథ

ఒక గ్రామంలో భాస్కర శర్మ, కమలమ్మ అనే దయగల బ్రాహ్మణ దంపతులు నివసించేవారు. వారు ధానధర్మాలు చేస్తూ, అందరికీ ఆదర్శంగా ఉండేవారు. అయితే ఎన్నో సంవత్సరాల పాటు వారికి సంతానం కలగలేదు. పిల్లల కోసమని ఎన్నో పూజలు, వ్రతాలు, నోములు చేశారు. చివరకు వారి భక్తి ఫలించి వారికి ఓ పండంటి బిడ్డ జన్మించాడు. ఆ బిడ్డను వారు కన్నులపండువుగా, అల్లారుముద్దుగా పెంచుకున్నారు.

ఒక రోజు భాస్కర శర్మ పక్క గ్రామం నుండి తిరిగి వస్తుండగా దారిలో ఒక ముంగిస కనిపించింది. అది అతని దగ్గరకు వచ్చి చుట్టూ తిరిగింది. దానిపై కరుణ కలిగిన శర్మ దాన్ని ఇంటికి తీసుకువచ్చి, “ఇది మన బిడ్డకు తోడుగా ఉంటుంది. మనం దీనిని పెంచుకుందాం” అని కమలమ్మతో చెప్పాడు. ఆమె కూడా సంతోషంగా అంగీకరించింది. ఆ రోజు నుంచి బిడ్డతో పాటు ముంగిసను కూడా ఎంతో ప్రేమగా పెంచసాగారు. ఒక రోజు భాస్కర శర్మ పూజ కార్యక్రమం కోసం బయటకు వెళ్లాడు. కమలమ్మ ఇంటి పనులు పూర్తి చేసి, బిడ్డకు పాలు ఇచ్చి ఊయలలో పడుకోబెట్టింది. ముంగిసకు ఆహారం పెట్టింది. తర్వాత బావి దగ్గరకు నీళ్లు తేవడానికి వెళ్లాల్సి రావడంతో, “నేను వచ్చే వరకు మన బిడ్డను జాగ్రత్తగా చూసుకో” అని ముంగిసతో చెప్పి బయలుదేరింది. ముంగిస ఊయల దగ్గరే కాపలా కాస్తూ నిలిచింది.

కొద్దిసేపటికి ఒక పెద్ద నల్లత్రాచు పాము ఇంట్లోకి జారుకుని ఊయల వైపు చేరింది. ప్రమాదాన్ని గమనించిన ముంగిస వెంటనే ఎగిరి పాముపై దాడి చేసింది. గట్టిగా పోరాడి చివరకు పామును చంపింది. దాని మూతికి రక్తం అంటుకుంది. బిడ్డను కాపాడిన ఆనందంతో ఇంటి ముందు కూర్చొని యజమానురాలు రావాలని ఎదురుచూసింది. అప్పుడే నీళ్లు తీసుకుని వచ్చిన కమలమ్మ ముంగిస నోట్లో రక్తం చూసి గుండెల్లో భయం పట్టుకుంది. ఇంట్లో ఎవరూ లేని సమయంలో నా బిడ్డను చంపేసిందని అనుకుంది. ఆవేశంతో, ఆలోచించకుండా చేతిలో ఉన్న నీటి బిందెను ముంగిసపై విసిరింది. గట్టిగా తగిలిన దెబ్బతో ముంగిస అక్కడికక్కడే ప్రాణాలు కోల్పోయింది.

ఏడుస్తూ లోపలికి పరుగెత్తిన కమలమ్మ, ఊయలలో బిడ్డ క్షేమంగా నవ్వుతూ ఆడుకుంటున్నాడు. పక్కనే పెద్ద నల్లత్రాచు పాము చచ్చి పడింది. నిజం గ్రహించిన ఆమె గుండె పగిలిపోయింది. కొద్దిసేపటికి వచ్చిన భాస్కర శర్మకు జరిగిన సంగతంతా తెలిసి అతడూ దిగ్భ్రాంతి చెందాడు. “మన బిడ్డ ప్రాణాలు కాపాడిన ముంగిసను మనమే చంపేశాం” అంటూ ఇద్దరూ బోరున విలపించారు.

ఆ రోజు వారికి ఒక గొప్ప పాఠం తెలిసింది —
ఆవేశంలో తీసుకున్న నిర్ణయం తిరిగి సరిచేయలేని నష్టానికి దారి తీస్తుంది. నిజం తెలుసుకోకుండా తీర్పు ఇవ్వకూడదు.