సెంట్రల్‌ ఎలక్ట్రానిక్స్‌లో వివిధ పోస్టుల భర్తీ

Central Electronics Limited (సెంట్రల్‌ ఎలక్ట్రానిక్స్‌ లిమిటెడ్‌)లో వివిధ విభాగాల్లో మొత్తం 34 పోస్టుల భర్తీకి దరఖాస్తులను ఆహ్వానిస్తున్నారు. కేంద్ర ప్రభుత్వ రంగ సంస్థ అయిన ఈ సంస్థలో మేనేజ్‌మెంట్‌, టెక్నికల్‌, అడ్మినిస్ట్రేటివ్‌ విభాగాల్లో ఉద్యోగావకాశాలు కల్పిస్తున్నారు.

ఈ నియామకాల్లో డిప్యూటీ జనరల్‌ మేనేజర్‌, సీనియర్‌ టెక్నికల్‌ మేనేజర్‌, సీనియర్‌ మేనేజర్‌, డిప్యూటీ ఇంజినీర్‌, పర్సనల్‌ ఆఫీసర్‌, ఆపరేటర్‌ ‘ఏ’, క్లర్క్‌ ‘సీ’, గ్రాడ్యుయేట్‌ ఇంజినీర్‌ ట్రెయినీ, మేనేజ్‌మెంట్‌ ట్రెయినీ, హిందీ ఆఫీసర్‌/ రాజ్‌భాష అధికారుల వంటి పోస్టులు ఉన్నాయి. అభ్యర్థులు పోస్టును బట్టి పదోతరగతి నుంచి డిగ్రీ, బీఈ/బీటెక్‌, మాస్టర్స్‌ డిగ్రీ, ఎంబీఏ లేదా పీజీ డిప్లొమా వంటి విద్యార్హతలతో పాటు సంబంధిత అనుభవం కలిగి ఉండాలి.

వయోపరిమితి పోస్టును బట్టి మారుతుంది. డిప్యూటీ జనరల్‌ మేనేజర్‌ పోస్టుకు గరిష్ఠంగా 48 ఏళ్లు, సీనియర్‌ మేనేజర్‌/ సీనియర్‌ టెక్నికల్‌ మేనేజర్‌ పోస్టులకు 42 ఏళ్లు, డిప్యూటీ ఇంజినీర్‌, పర్సనల్‌ ఆఫీసర్‌, క్లర్క్‌ ‘సీ’ పోస్టులకు 30 ఏళ్లు, ఆపరేటర్‌ ‘ఏ’కు 25 ఏళ్లు, గ్రాడ్యుయేట్‌ ఇంజినీర్‌ ట్రెయినీకి 27 ఏళ్లు, మేనేజ్‌మెంట్‌ ట్రెయినీకి 29 ఏళ్లు, హిందీ ఆఫీసర్‌/ రాజ్‌భాష అధికారికి 63 ఏళ్లు గరిష్ఠ వయోపరిమితిగా నిర్ణయించారు.

ఎంపిక ప్రక్రియలో రాత పరీక్ష, ఇంటర్వ్యూ, ధ్రువపత్రాల పరిశీలన ఉంటాయి. ఎంపికైన అభ్యర్థులకు పోస్టును బట్టి నెలకు రూ.17,500 నుంచి రూ.2,20,000 వరకు వేతనం అందుతుంది. దరఖాస్తు ఫీజు రూ.1000 కాగా ఎస్సీ, ఎస్టీ, దివ్యాంగులు, మాజీ సైనికోద్యోగులకు ఫీజు మినహాయింపు ఉంది. ఆసక్తి గల అభ్యర్థులు అధికారిక వెబ్‌సైట్‌ ద్వారా ఆన్‌లైన్‌లో దరఖాస్తు చేసుకోవాలి. దరఖాస్తులకు చివరి తేదీ 14 మార్చి 2026.ఈ నియామకాల ద్వారా కేంద్ర ప్రభుత్వ రంగ సంస్థలో ఉద్యోగం పొందాలనుకునే అభ్యర్థులకు మంచి అవకాశం లభించనుంది.