కాజీపేట రైల్వే డివిజన్‌ ఏర్పాటు చేయాలి : కేంద్ర మంత్రికి కేటీఆర్‌ బహిరంగ లేఖ.

కాజీపేటను తక్షణమే రైల్వే డివిజన్‌గా ఏర్పాటు చేయాలని డిమాండ్ చేస్తూ భారాస కార్యనిర్వాహక అధ్యక్షుడు కేటీఆర్ కేంద్ర రైల్వే శాఖ మంత్రి అశ్వినీ వైష్ణవ్‌కు లేఖ రాశారు. ఈ లేఖను ఆ పార్టీ ఎంపీల బృందం బుధవారం ఢిల్లీలో కేంద్రమంత్రికి స్వయంగా అందజేసింది. తెలంగాణ రైల్వే నెట్‌వర్క్‌లో కాజీపేట అత్యంత కీలకమైన జంక్షన్ అని, దీనిని ప్రత్యేక డివిజన్‌గా ప్రకటించడం వల్ల సుమారు రెండు వేల ట్రాక్ కిలోమీటర్ల మేర రైల్వే వ్యవస్థను అత్యంత సమర్థవంతంగా నిర్వహించే అవకాశం ఉంటుందని కేటీఆర్ తన లేఖలో వివరించారు.

ప్రతిపాదిత కాజీపేట డివిజన్ పరిధిలోకి కాజీపేట-బల్లార్షా, పెద్దపల్లి-నిజామాబాద్, కాజీపేట-ఎర్రుపాలెం వంటి కీలక మార్గాలతో పాటు డోర్నకల్-మనుగూరు మరియు సత్తుపల్లి సెక్షన్లను చేర్చడం వల్ల కార్యకలాపాలు మరింత సులభతరం అవుతాయని కేటీఆర్ పేర్కొన్నారు. ఈ మార్గాలన్నీ ఆర్థికంగా మరియు ప్రయాణికుల రద్దీ పరంగా అత్యంత ప్రాధాన్యత కలిగినవి కావడంతో, ప్రత్యేక డివిజన్ ఏర్పాటు వల్ల రైల్వే శాఖకు కూడా మేలు జరుగుతుందని ఆయన అభిప్రాయపడ్డారు.

ఇదే క్రమంలో పెద్దపల్లి-నిజామాబాద్ సెక్షన్‌ను హైదరాబాద్ డివిజన్‌కు బదిలీ చేసే ఆలోచనను కేంద్రం వెంటనే విరమించుకోవాలని కేటీఆర్ డిమాండ్ చేశారు. దశాబ్దాలుగా పెండింగ్‌లో ఉన్న కాజీపేట డివిజన్ డిమాండ్‌ను నెరవేర్చడం ద్వారా ఉత్తర తెలంగాణ రైల్వే ప్రయాణికులకు మరియు సరకు రవాణా వ్యవస్థకు గొప్ప మేలు జరుగుతుందని ఆయన కేంద్రమంత్రి దృష్టికి తీసుకెళ్లారు. విభజన హామీలను అమలు చేయడంలో భాగంగా ఈ డివిజన్ ఏర్పాటు ప్రక్రియను వేగవంతం చేయాలని ఆయన కేంద్ర ప్రభుత్వాన్ని కోరారు.