హైబీపీ నియంత్రణ లేకపోతే మెదడు నష్టానికి కారణమవుతుందని నిపుణుల సూచన

అధిక రక్తపోటు (హైబీపీ) అనగానే చాలామందికి గుండెపోటు మాత్రమే గుర్తుకొస్తుంది. కానీ నిజానికి ఇది మెదడు ఆరోగ్యాన్ని కూడా తీవ్రంగా దెబ్బతీస్తుంది. నియంత్రణలో లేకపోతే ఏళ్ల తరబడి ఎలాంటి స్పష్టమైన లక్షణాలు లేకుండానే మెదడు నష్టం కొనసాగుతుందని నిపుణులు హెచ్చరిస్తున్నారు.

ప్రారంభ దశలో ఈ ప్రభావం చాలా సూక్ష్మంగా ఉంటుంది. తరచూ పేర్లు, వస్తువులు ఉంచిన చోట్లు మరచిపోవడం, ఆలోచనలు నెమ్మదించడం, మాట్లాడేటప్పుడు ఏకాగ్రత తగ్గడం వంటి లక్షణాలు కనిపిస్తాయి. వీటిని చాలామంది ఒత్తిడి, నిద్రలేమి లేదా వృద్ధాప్య కారణంగా పొరబడే అవకాశం ఉంది.

అసలు సమస్య మెదడులోని రక్తనాళాల నష్టంలో దాగి ఉంటుంది. మన శరీరంలో సుమారు 20% ఆక్సిజన్‌ను మెదడే వినియోగిస్తుంది. అందుకే మెదడుకు నిరంతర రక్తప్రసరణ అవసరం. రక్తపోటు ఎక్కువగా కొనసాగితే మెదడుకు రక్తాన్ని సరఫరా చేసే సున్నితమైన నాళాలు దెబ్బతిని బిగుతుగా మారుతాయి. దీంతో రక్తప్రవాహం తగ్గి మెదడు పనితీరుపై ప్రభావం పడుతుంది.

ఈ మార్పులు జ్ఞాపకశక్తి, ఏకాగ్రత, నిర్ణయ సామర్థ్యం, శరీర నియంత్రణ వంటి అంశాలపై తీవ్ర ప్రభావం చూపుతాయి. ముఖ్యంగా ఈ ప్రక్రియ నెమ్మదిగా, స్పష్టమైన లక్షణాలు లేకుండా కొనసాగుతుండటంతో చాలా సందర్భాల్లో ఆలస్యంగా గుర్తించబడుతుంది.

కాబట్టి హైబీపీని నిర్లక్ష్యం చేయకూడదని వైద్యులు హెచ్చరిస్తున్నారు. సూచించిన మందులు క్రమం తప్పకుండా వాడటం, ఉప్పు తగ్గించిన ఆహారం తీసుకోవడం, నియమిత వ్యాయామం చేయడం ద్వారా ఈ ప్రమాదాన్ని తగ్గించవచ్చని నిపుణులు సూచిస్తున్నారు.